17/3/2018 03:45 PM

منداڵه‌كه‌ت كێشه‌ی دره‌نگ قسه‌كردنی هه‌یه‌؟!

به‌وته‌ی د.ئاوات واژه‌یی، دایكان و باوكان پێویسته‌ ئه‌م رێنماییانه‌ جێبه‌جێ بكه‌ن بۆ دڵنیابوون له‌وه‌ی منداڵه‌كه‌یان له‌كاتی خۆی قسه‌ده‌كات یان دواده‌كه‌وێت.

1- له‌كاتی یاری كردن له‌گه‌ڵ منداڵه‌كه‌ت قسه‌ی له‌گه‌ڵ بكه‌و به‌بێ ده‌نگی یاری له‌گه‌ڵ مه‌كه‌.

2- هه‌ستی باوه‌ڕ به‌خۆبوون به‌ منداڵه‌كه‌ت ببه‌خشه‌، كاتێك قسه‌ی له‌گه‌ڵ ده‌كه‌یت به‌ئارامی دایبنیشێنه‌و به‌ نه‌رمونیانی قسه‌ی له‌گه‌ڵ بكه‌ نه‌ك به‌شێوه‌ی ره‌سمی.

3- دڵنیابه‌ منداڵه‌كه‌ت هه‌میشه‌ گوێ بۆ قسه‌كانت ده‌گرێت چ له‌كاتی راهێنان بێت یان كاتی تر.

4- كاتێك منداڵه‌كه‌ت وه‌ڵامت ده‌داته‌وه‌ زیاتر هانی بده‌ تا متمانه‌ی زیاتری به‌خۆی هه‌بێت.

5- وشه‌ی جوان و ساده‌و ئاسان به‌كاربهێنه‌ له‌گه‌ڵ ته‌مه‌نی منداڵه‌كه‌ت گونجاوبێت و له‌ئاستی ئه‌و زیاتر نه‌بێت.

6- به‌ زاراوه‌ی دروست له‌گه‌ڵ منداڵه‌كه‌ت بدوێ، دووربكه‌وه‌ له‌ به‌كارهێنانی وشه‌ی ئاڵوز كه‌ توانای فێربوونی نه‌بێت.

7- له‌ ژوورێكی بێده‌نگدا له‌گه‌ڵ منداڵه‌كه‌ت دابنیشه‌ كاتێك راهێنانی پێده‌كه‌یت، دوور له‌ ژاوه‌ژاو و هه‌رشتێك كه‌ سه‌رقاڵی بكات.

8- قسه‌ له‌گه‌ڵ منداڵه‌كه‌تدا بكه‌ له‌باره‌ی ئه‌و كارو هه‌ڵوێستانه‌ی رۆژانه‌ ئه‌نجامیان ده‌دات یان ده‌یانبینێت.

9- كاتی ته‌واو به‌ منداڵه‌كه‌ت بده‌ بۆ وه‌ڵامدانه‌وه‌، په‌له‌ی لێمه‌كه‌ با نه‌شڵه‌ژێت و نه‌توانێت وه‌ڵام بداته‌وه‌.

10- ئه‌مكاره‌ ته‌نها له‌گه‌ڵ منداڵه‌كه‌ت بكه‌و روبه‌ڕووبه‌ له‌گه‌ڵیدا، چونكه‌ به‌م شێوه‌یه‌ زیاتر ئاره‌زووی گوێگرتنی ده‌بێت.

11- هاوكاری منداڵه‌كه‌ت بكه‌ بۆ گرێدانه‌وه‌ی ئه‌و ده‌نگانه‌ی ده‌یانبیستێت له‌گه‌ڵ ناوی راسته‌قینه‌ی وشه‌كان، واته‌ ئه‌و شتانه‌ی ده‌نگه‌كانیان بۆ به‌كارهاتووه‌.

12- هه‌وڵبده‌ هه‌موو هه‌سته‌وه‌ره‌كانی منداڵ به‌كاربهێنیت و سوودیان لێوه‌ربگریت له‌كاتی راهێنانی منداڵ به‌ قسه‌كردن.

13- ئه‌گه‌ر منداڵه‌كه‌ت له‌ ده‌ربڕیندا هه‌ڵه‌ی كرد راسته‌وخۆ لۆمه‌ی مه‌كه‌، ته‌نها هه‌ڵه‌كه‌ی بۆ راستبكه‌وه‌و هانی بده‌.

14- كاتێك منداڵه‌كه‌ت هه‌وڵی قسه‌كردن ده‌دات خێرا هانی بده‌ تا هه‌ست به‌وه‌ بكات ئه‌م قسه‌یه‌ی كارێكی باش و ئه‌رێنیه‌. 

15- هه‌وڵی زیادكردنی وشه‌كانی بده‌ كاتێك منداڵه‌كه‌ت ده‌ڵێت ئۆتۆمبیل فێری بكه‌ بڵێت ئۆتۆمبێلی گه‌وره‌ یان ئۆتۆمبێلی بابه‌.

16- هانی منداڵه‌كه‌ت بده‌ لاسایی ئه‌و ده‌نگانه‌ بكاته‌وه‌ كه‌ له‌ ژینگه‌ی ده‌وروبه‌ریه‌وه‌ ده‌یانبیستێت.


خاك – ئا: ته‌نیا ئاواره‌



created by Avesta Group and powered by Microsoft Azure

Copyright © 2015 khaktv all rights reserved