11/6/2018 10:57 AM

وه‌زاره‌تی په‌روه‌رده‌ سه‌ركه‌وتنی پرۆسه‌ی تاقیكردنه‌وه‌كانی راگه‌یاند

وه‌زاره‌تی په‌روه‌رده‌ له‌ راگه‌یه‌نراوێكدا كه‌ كۆپیه‌كی بۆ خاك نێدراوه‌، تێیدا سه‌ركه‌وتنی پرۆسه‌ی تاقیكردنه‌وه‌كانی كۆتایی ساڵی پۆله‌كانی 12 ی ئاماده‌یی و 9 بنه‌ڕه‌تی راگه‌یاند.

ده‌قی راگه‌یه‌نراوه‌كه‌...

به‌خۆشحاڵییه‌وه‌ سه‌ركه‌وتنی به‌ڕێوه‌چوونی پڕۆسه‌ی تاقیكردنه‌وه‌ وه‌زاری و نیشتمانییه‌كانی هه‌ردوو پۆلی 12ی ئاماده‌یی و 9ی بنه‌ڕه‌تی له‌ سه‌رتاسه‌ری هه‌رێمی كوردستان ڕاده‌گه‌یه‌نین. 

جێگه‌ی شانازی حكومه‌تی هه‌رێمی كوردستان و وه‌زاره‌تی په‌روه‌رده‌و هه‌موو لایه‌كه‌، كه‌ له‌م كاته‌ هه‌ستیارو له‌م دۆخه‌ قورسه‌ ئابوورییه‌ی هه‌رێمی كوردستان، پڕۆسه‌یه‌كی نیشتمانی و هه‌ستیاری وه‌ها گه‌وره‌ به‌ڕێوه‌ده‌چێت كه‌ تیایدا زیاتر له‌ 250 هه‌زار قوتابی و خوێندكار به‌ چاودێری زیاتر له‌ 24 هه‌زار مامۆستا له‌ 4500 هۆڵ تاقیكردنه‌وه‌یان ئه‌نجامدا.

لێره‌وه‌ زۆر سوپاسی لیژنه‌ی باڵای ئه‌زموونه‌كان و سه‌رجه‌م سه‌رپه‌رشتیاران و لیژنه‌ ئه‌زموونییه‌كانی په‌روه‌رده‌ی پارێزگاو قه‌زاكان و به‌رپرسانی په‌روه‌رده‌و به‌ڕێوه‌به‌ری هۆڵه‌كان و چاودێرانی خۆشه‌ویست ده‌كه‌ین كه‌ به‌م پڕۆسه‌یه‌وه‌ ماندووبوون و به‌ شه‌ونخوونییه‌كانیان توانیان خزمه‌تێكی بێوێنه‌ بكه‌ن.

هیوای سه‌ركه‌وتنیش بۆ قوتابیان و خوێندكارانی خۆشه‌ویست ده‌خوازین و دڵنیایان ده‌كه‌ینه‌وه‌ كه‌ هه‌وڵ و شه‌ونخوونییه‌كانیان به‌فیڕۆناچێت و به‌وپه‌ڕی دادپه‌روه‌رییه‌وه‌ مافی خۆیان وه‌رده‌گرن.

له‌ كۆتاییدا سوپاسی هه‌موو ده‌زگا ئه‌منی و خزمه‌تگوزارییه‌كانی حكومه‌تی هه‌رێم و كه‌ناڵه‌كانی ڕاگه‌یاندن ده‌كه‌ین كه‌ هه‌ستیارانه‌ مامه‌ڵه‌یان له‌گه‌ڵ دۆخه‌كه‌دا كرد.


خاك - راگه‌یاندنی وه‌زاره‌تی په‌روه‌رده‌



created by Avesta Group and powered by Microsoft Azure

Copyright © 2015 khaktv all rights reserved