2/7/2018 08:56 AM

سلێمانی.. لیژنه‌ی باڵای ئارامی چه‌ند بڕیارێك ده‌رده‌كات

ڕۆژی 1-7-2018 له‌ دیوانی پارێزگای سلێمانی، پارێزگاری سلێمانی سه‌رپه‌رشتیی كۆبوونه‌وه‌ی لیژنه‌ی باڵای ئارامی پارێزگای سلێمانی كرد، له‌ كۆبوونه‌وه‌كه‌دا به‌وردی باس له‌ بارودۆخی ئاسایش‌ و ئارامی پارێزگاكه‌و هه‌رێمی كوردستان‌ و ناوچه‌كه‌ كراو سوپاسی هاووڵاتیان‌ و هه‌موو فه‌رمانگه‌و لایه‌نه‌ په‌یوه‌ندیداره‌كان كرا كه‌ به‌ دڵسۆزانه‌و گیانێكی به‌رپرسانه‌و نیشتمانییانه‌وه‌ ئه‌ركه‌كانی خۆیان جێبه‌جێ‌ كردووه‌.

له‌پێناو پاراستنی ئارامی و ئاسایشی هاووڵاتیان و پارێزگاكه‌شدا بڕیاردرا به‌:

یه‌كه‌م: به‌رده‌وامبوونی لیژنه‌ی هاوبه‌شی هێزه‌كانی ناوخۆ كه‌ پێشتر به‌ فه‌رمانی پارێزگار پێكهێنراون، بۆ بنه‌بڕكردنی تاوان‌ و دیارده‌ی چه‌كداری و ئۆتۆمبێلی بێ‌ ژماره‌و بێ‌ مۆڵه‌ت‌ و هه‌ر سه‌رپێچییه‌كی تر.

دووه‌م: به‌رده‌وامبوونی هه‌ماهه‌نگیكردنی لیژنه‌ی ئارامی شاری سلێمانی و لیژنه‌كانی قائیمقامییه‌تی سلێمانی و لایه‌نه‌ په‌یوه‌ندیداره‌كانی تر بۆ جێبه‌جێكردنی ئه‌و ڕێنماییانه‌ی بۆ قه‌ده‌غه‌كردنی دیارده‌ی سه‌رپێچیكردن‌ و زیاده‌ڕه‌ویی و خراپیی كوالێتی و سواڵكردن‌ و تێكدانی نه‌زمی گشتی و هه‌ر دیارده‌یه‌كی نه‌خوازراوی تر پێكهێنراون.

سێیه‌م: ده‌ستگیركردنی هه‌موو ئه‌و گومانلێكراوانه‌ی له‌لایه‌ن دادگاوه‌ داواكراون.

چواره‌م: هه‌ر كه‌سێكی بیانی كه‌ مۆڵه‌تی مانه‌وه‌ی له‌ هه‌رێمی كوردستاندا پێدراوه‌، پێویسته‌ سێ‌ مانگ جارێك پشكنینێكی ته‌ندروستی ڕه‌سمی بكات و به‌پێچه‌وانه‌وه‌ خۆشی‌ و ئه‌و شوێنه‌یشی كاری تێدا ده‌كات به‌رپرسیار ده‌بن.

پێنجه‌م: هێزه‌كانی لیوای یه‌كی پاراستنی سلێمانی و پۆلیسی به‌رگری و فریاكه‌وتن، هاوكارو هه‌ماهه‌نگی هێزه‌كانی ناوخۆو ئاسایش ده‌بن بۆ ڕێگرتن له‌هه‌ر زیاده‌ڕه‌وی و سه‌رپێچیكردن‌ و هه‌ر دۆخێكی پێویست، به‌پێی ڕێنمایی پارێزگاری سلێمانی.

شه‌شه‌م: به‌ڕێوه‌به‌رایه‌تی به‌رگری شارستانی پارێزگای سلێمانی، هه‌موو تیمه‌كانی ئاماده‌ ده‌كات بۆ هه‌ر حاڵه‌تێكی نه‌خوازراو و ئاگركه‌وتنه‌وه‌یه‌ك، له‌مباره‌یه‌وه‌ ڕێنمایی پێویست پێشكه‌ش به‌ هاووڵاتیان و فه‌رمانگه‌و كۆمپانیاكان ده‌كات.

حه‌وته‌م: به‌ڕێوه‌به‌رایه‌تیی پۆلیسی دارستان‌ و ژینگه‌ی پارێزگای سلێمانی، ڕێگری له‌هه‌ر حاڵه‌تێكی بیرهه‌ڵكه‌ندنی نایاسایی ده‌كات‌ و به‌پێی یاساو له‌به‌ر ڕۆشنایی ڕێنماییه‌كانی پارێزگاری سلێمانیدا؛مامه‌ڵه‌ له‌گه‌ڵ ئه‌م دۆسیه‌یه‌دا ده‌كات، هه‌روه‌ها به‌وردی ڕێنماییه‌كانی په‌یوه‌ست به‌ پاراستنی دارستان‌ و ژینگه‌و ڕاوكردن جێبه‌جێ‌ ده‌كات.

هه‌شته‌م: ڕێكخستنه‌وه‌ی گرتوخانه‌كان‌ و نه‌هێشتنی هیچ جیاوازی و جیاكارییه‌ك‌و چاودێریكردنی وردی شێڵته‌رو خانه‌و گرتووخانه‌و دامه‌زراوه‌ كۆمه‌ڵایه‌تییه‌كانی تر.

نۆیه‌م: پێویسته‌ هه‌موو یه‌كه‌ كارگێڕییه‌كانی سنووری پارێزگای سلێمانی له‌گه‌ڵ بڵاوكردنه‌وه‌ی ئه‌م ڕاگه‌یه‌نراوه‌دا، بڕیارو ڕێنماییه‌كانی لیژنه‌ی باڵای ئارامی پارێزگای سلێمانی جێبه‌جێبكه‌ن.

ده‌یه‌م: لیژنه‌ی باڵای ئارامی پارێزگای سلێمانی له‌ چوارچێوه‌ی كۆبوونه‌وه‌كانی سه‌روه‌ری یاسادا؛ له‌گه‌ڵ به‌ڕێزان سه‌رۆكی دادگاكان‌ و داواكاری گشتی و دادوه‌ره‌كاندا كۆده‌بێته‌وه‌، به‌ مه‌به‌ستی دانانی چێوه‌یه‌كی یاسایی پته‌و بۆ چه‌سپاندنی یاساو سزادانی تاوانباران.

یانزده‌یه‌م: ڕێكخستنه‌وه‌ی شوێن‌ و دامه‌زراوه‌ گه‌شتیارییه‌كان و شوێنه‌ گشتییه‌كان به‌پێی ڕێنماییه‌كانی پێشووی لیژنه‌ی باڵای ئارامی پارێزگای سلێمانی.

دوانزده‌یه‌م: تیمی فریاكه‌وتنی هاوبه‌ش بۆ شوێنه‌ گه‌شتیاری و گشتییه‌كان پێكده‌هێنرێن.

سیانزده‌یه‌م: هه‌موو ئه‌م بڕیارو ڕێنماییانه‌ به‌بێ‌ جیاوازی و گوێدانه‌ پله‌و پایه‌و پۆستی كه‌سه‌ سه‌رپێچیكه‌ره‌كان، جێبه‌جێده‌كرێن.

چوارده‌یه‌م: پارێزگاری سلێمانی؛ پشتیوانی و هاوكاری پێویست پێشكه‌ش به‌ هه‌موو فه‌رمانگه‌و لایه‌نه‌ په‌یوه‌ندیداره‌كان ده‌كات بۆ باشتر به‌ڕێوه‌چوونی كاره‌كانیان‌.

لیژنه‌ی باڵای ئارامی پارێزگای سلێمانی سوپاسی بڕیارو ده‌ستپێشخه‌رییه‌كه‌ی فه‌رمانده‌یی گشتی هێزی پێشمه‌رگه‌ی كوردستان و دامه‌زراوه‌كانی تر ده‌كات، كه‌ پشتیوان‌ و جێبه‌جێكاری بڕیارو ڕێنماییه‌كانی پارێزگاری سلێمانی و لیژنه‌ی باڵای ئارامی پارێزگای سلێمانی ده‌بن.


خاك



created by Avesta Group and powered by Microsoft Azure

Copyright © 2015 khaktv all rights reserved