19/7/2018 09:17 AM

كه‌ره‌وز و شویت دژه‌ شێرپه‌نجه‌ن

توێژینه‌وه‌یه‌ك گرنگی كه‌ره‌وز‌و شویت ده‌خاته‌ڕوو وه‌ك دوو بابه‌تی دژه‌ شێرپه‌نجه‌ ناوزه‌ندیان ده‌كات.

هه‌رچه‌نده‌  خه‌ڵك به‌ شێوه‌یه‌كی گشتی له‌ خواردنه‌كانیاندا كه‌ره‌وز و شویت به‌كارده‌هێنن و زۆرجار بۆ ڕازاندنه‌وه‌ی سفره‌و خوانه‌كانیان به‌كاریده‌هێنن، به‌ڵام شته‌كه‌ له‌ دیمه‌نی جوانی ئه‌و دوو سه‌وزه‌یه‌ زیاتره‌، له‌به‌رئه‌وه‌ی سوودێكی ته‌ندروستی زۆریشیان هه‌یه‌.

ئه‌مه‌ش ئه‌وه‌یه‌ كه‌ توێژینه‌وه‌كه جه‌ختی له‌سه‌ر ده‌كاته‌وه‌، ئه‌نجامه‌كانیشی له‌ گۆڤاری زانستی (Journal of Natural Products)دا بڵاوكراوه‌ته‌وه‌و توێژینه‌وه‌كه‌ ئاماژه‌ی به‌وه‌ داوه‌ كه‌ خواردنی ئه‌و سه‌وزانه‌ یارمه‌تیده‌ره‌ بۆ كه‌مكردنه‌وه‌ی توشبوون به‌ جۆره‌كانی شێرپه‌نجه‌.

به‌پێی ئه‌و توێژینه‌وه‌یه‌ ئه‌و سه‌وزانه‌ جۆره‌ مادده‌یه‌كی كیمیايیان تێدایه‌ به‌ ناوی (glaziovianin A) كه‌ ناهێڵیت گرێی شێرپه‌نجه‌یی دروستبێت، ئه‌ویش له‌ڕێگه‌ی په‌كخستنی پرۆسه‌ی دابه‌شبوونی خانه‌ شێرپه‌نجه‌ییه‌كان و بڵاوبوونه‌وه‌یان و دواجاریش كه‌سه‌كان له‌ توشبوون به‌ نه‌خۆشی شێرپه‌نجه‌ ده‌پارێزێت. هه‌روه‌ها گه‌ردیله‌ی ناو ئه‌و سه‌وزانه‌ پێكهاته‌یه‌ك دروستده‌كات كه‌ تایبه‌تمه‌ندی دژه‌ شێرپه‌نجه‌ی هه‌یه‌.

پێشتریش ئه‌وه‌ زانراوه‌ كه‌ خواردنی كه‌ره‌وزو  شویت به‌سووده‌ بۆ نه‌هێشتنی بۆنی ناخۆشی ده‌م و به‌رگری له‌ش زیاد ده‌كات و توانای بینین به‌هێز ده‌كات و قژ ڕووتانه‌وه‌ كه‌مده‌كاته‌وه‌.

توێژه‌ره‌وه‌كان هیواخوازن ئه‌و پێكهاته‌یه‌ی ناو كه‌ره‌وز‌و شویت یارمه‌تیان بدات بۆ گه‌شه‌پێدانی ده‌رمانێك و له‌ داهاتوودا به‌شداربێت له‌ قه‌لاچۆكردنی هه‌موو جۆره‌كانی شێرپه‌نجه‌، چاوه‌روانیش ده‌كرێت ئه‌گه‌ر ده‌رمانێكی وا دروستبكرێت به‌ ئاسانی به‌رده‌ست بێت‌ و نرخیشی هه‌رزان بێت، چونكه‌ ئه‌و دوو سه‌وزه‌یه‌ زۆره‌و شتێكی ده‌گمه‌ن نیه‌.

له‌گه‌ڵ ئه‌مانه‌شدا هێشتا توێژه‌ره‌وه‌كان داوا ده‌كه‌ن هه‌وڵی زیاتر بدرێت بۆ تاقیكردنه‌وه‌ی زۆرتر له‌سه‌ر ئه‌و دوو سه‌وزه‌یه‌، بۆ ئه‌وه‌ی به‌ته‌واوی دڵنیابن له‌ ئه‌نجامه‌كان، ئه‌گه‌ر هه‌موو ئه‌نجامه‌كان وه‌ك یه‌ك بن، ئه‌وا به‌كارهێنانی ئه‌و دوو سه‌وزه‌یه‌ ده‌بێته‌ وێستگه‌یه‌كی گرنگ له‌ ڕێره‌وی پزیشكیدا


خاك -  س: safhaa



created by Avesta Group and powered by Microsoft Azure

Copyright © 2015 khaktv all rights reserved