لە جیهاندا سكچوون بە یەكێك لە نەخۆشییە هەرە مەترسیدارەكان دادەنرێت، بەپێی راپۆرتەكانی رێكخراوی تەندروستی جیهانی مەترسی گەورە لەسەر ژیانی منداڵانی خوار تەمەن پێنج ساڵان دروستدەكات ئەگەر بەزووی چارەسەرنەكرێت. پاكوخاوێنی و هۆشیاری تەندروستی و بەزوویی سەردانكردنی نەخۆشخانە لەكاتی توشبووندا منداڵەكەت بەدوور دەگرێت لەو مەترسيیە گەورەیە. هۆكارەكانی سكچوونی منداڵان: ئاوی پیس و خواردنی ناخاوێن، هۆكاری سەرەكی سكچوون و رشانەوەن بەتایبەت لە وەرزی هاویندا، ئەو منداڵانەی شیری دایكیان دەخۆن كەمتر توشی سكچوون دەبن، خۆ ئەگەریش سكچوون بگرن ئەوا ئاسانتر چارەسەردەكرێن و زووتر چاكدەبنەوە. بەگشتی، بەهۆی سكچوونەوە ئاو لە لەشی منداڵدا كەمدەكات و دەبێتە هۆی وشكبوونەوە، ئەگەر وشكبوونەوە بگاتە رێژەیەكی دیاریكراو ئەوكات مەترسی لەسەر گیانی منداڵەكەت دروستدەكات، ئەگەر چەند رۆژێك منداڵ سكی بچێ و بڕشێتەوەو چارەسەر وەرنەگرێت، ئەوا 20%ی كێشی منداڵەكەت كەمدەكات و چیتر منداڵ بەرگە ناگرێت. نیشانەكانی سكچوونی منداڵان: سكچوون و وشكبوونەوەو تینویەتی نیشانە سەرەتاییەكانن و پاشان نیشانەكانی تر بەدەردەكەون كە ئەوانیش بریتین لە: - تۆخبوونی رەنگی میز بە بەردەوامی - كەم میزكردن یاخود میزنەكردن - كەمبوونەوەی چالاكی و وزەی لەچاو رۆژانی ئاسایی - بێهێزی و نەبوونی ئارەزوو بۆ خواردن - وشكبوونەوەی دەم و لێو و گریانی بێ فرمێسك. نیشانە هەرە مەترسیدارەكان بەهۆی سكچوونی منداڵانەوە: هەندێكی نیشانەی تر هەیە كە بەهۆی سكچوونەوە منداڵ توشی دەبێت و ئەگەر زوو بەزوو چارەسەرنەكرێت ئەوا ژیانی لەمەترسیدایە لەوانە: - ئەگەر منداڵەكە شیر یان ئاو نەخوات. - ئەگەر منداڵەكە چاوی زۆر بەقوڵا بچێت. - ئەگەر منداڵەكە دەست و قاچی ساردبووەوە. - ئەگەر منداڵەكە زۆر خەواڵووبوو. - ئەگەر هەناسەدانی زۆر خێرابوو. رێنمایی: * بۆ پاراستنی منداڵ لە سكچوون، زۆر گرنگە لە لەدایكبوونیەوە تا تەمەنی دوو ساڵ شیری دایكی بخوات. * گرنگیدان بە پاكوخاوێنی منداڵ بەتایبەت لەرووی كوڵاندنی ئاوی خواردنەوەو خاوێنی قاپ و كەوچك و ئەو شتانەی كە پەیوەندەی راستەوخۆی هەیە بە خواردنی منداڵەوە. * دەتوانرێت تەنها بە گرتنەبەری رێوشوێنی پاكوخاوێنی ئاو و خواردن بەرێژەی 95% رێگری بكرێت لە توشبوون بە سكچوون و رشانەوە. خاك - ڕاگەیاندنی تەندروستی سلێمانی
created by Avesta Group and powered by Microsoft Azure