ئامەد_ژینۆ عەبدولڵا
شاری ئامەدی باكوری كوردستان، بە مێژووترین و دێرینترین شارستانیەتی جیهان دادەنرێت، یەكێك لەو ناوچە شوێنەواریانە (حەسەن پاشایە) دەكەوێتە ناوچەی مێژوویی سور(قەڵای ئامەد) بەرامبەر مزگەوتی گەورەی شارەكە. شوێنەواری حەسەن پاشا كە وەك خان و كاروانسەرای بەكارهاتووە بنیاتنانی ماوەی چواری ساڵی خایاندوە (1572-1575)، لەلایەن حەسەن پاشا والی ئامەدەوە دروستكراوە. ئێستا ئەم شوێنە بۆتە ناوچەیەكی گەشتیاری فراوان كە پێكهاتوە لە دووكان و منارەو قەیسەری لەسەر دیزان و ستایلی شامی و لەدوریشەوە پێكهاتەیەكی بازنەیی شێوە قەڵای دێرینی هەیە. لەحەسەن پاشا خۆشترین نانی بەیانی و زۆرترین جۆری نان خواردنت بۆ دەهێنن و لەم دیمەنە مێژووی و دێرینەشدا خۆشیەكی بێ وێنە دەبەخشێتە گەشتیاران وەك خۆیان ئەڵێن قاوەڵتیەكی بەتام بۆ میوانان و گەشتیاران ئامادە دەكەن. حەسەن پاشا لە دوو نهۆم پێكهاتووە، بێجگە لەشوێنی قاوەڵتی و قاوەخانە، چێشتخانە و چایخانەكانیش بە شێوەی دیزان كۆن و سادە دروستكراوە كە سەرنجی گەشتیاران ڕادەكێشێت. دوكانەكانی تر بۆ فرۆشتنی جلوبەرگ و بۆن و تابلۆ و بابەتی مێژوویی تەرخانكراوە. مامەند ئەبوبەكر دەرچووی بەشی سینەماو تەلەفزێۆنی زانكۆی ئیستەنبول بوو، دەربارەی حەسەن پاشا ئاماژەی بەوەكرد، دیمەنی دڵڕفێنی ئەم شوێنە شەوانە، زیاتر دەردەكەوێت بە تایبەت كاتێك گۆرانی و میوزك و سترانی كوردی دەچڕن و تا بەرەبەیان میوانان و گەشتیاران دڵخۆش دەكەن. كاتێك سەردانی حەسەن پاشا دەكەیت بەبینینی دیزاین و ستایلی دوكانەكاندا مێژووە دێرینەكەی پارێزراوەو تاڕادەیەكی زۆر یادەوریت دەگێڕێتەوە بۆ ئەو سەردەم و مێژووە دێرینە.
created by Avesta Group and powered by Microsoft Azure