25/9/2018 11:30 AM

هۆكارو چاره‌سه‌ری سه‌رئێشه‌ له‌كاتی ڕیجێم كردن

زۆرن ئه‌و كه‌سانه‌ی توشی سه‌رئێشه‌ ده‌بن له‌كاتی ڕێجیم كردن به‌تایبه‌ت له‌ چه‌ند ڕۆژێكی سه‌ره‌تادا، بۆ زانینی هۆكاره‌كانی و چۆنێتی چاره‌سه‌ركردنی، د.كامه‌ران ڕه‌سوڵ ژاژڵه‌یی پسپۆڕی زانستی خۆراك و نه‌شته‌رگه‌ری به‌ سایتی خاكی راگه‌یاند: گرنگترین هۆكاره‌كانی سه‌رئێشه‌ی كاتی ڕێجیم كردن ئه‌مانه‌ن:

1- سه‌رئێشه‌ی برسیه‌تی: كه‌مكردنه‌وه‌ی بڕی خواردن له‌كاتی ڕێجیم به‌ ڕێژه‌یه‌كی زۆرو له‌پڕ، ئه‌و كه‌سه‌ توشی سه‌رئێشه‌ی برسێتی ئه‌كات به‌تایبه‌ت كاتێك ژه‌می به‌یانی یان ژه‌مه‌كێكی تر نه‌خوات.

2- نه‌خواردنه‌وه‌ی بڕی پێویست له‌ ئاو: ده‌بێته‌ هۆی وشكبوونه‌وه‌ی له‌ش و دابه‌زینی فشاری خوێن، چونكه‌ كاتی ڕێجیم له‌ش پێویستی به‌ ئاوی زیاتر هه‌یه‌ بۆ سووتانی چه‌وری.

3- خواردنه‌وه‌ی چاو قاوه‌ی زۆر: چا یان قاوه‌ خواردنه‌وه‌ی زۆر ده‌بێته‌ هۆی كه‌مكردنه‌وه‌ی ئیشتیها له‌ زۆر كه‌س، بۆیه‌ كاتی ڕێجیم بڕێكی زۆری لێ ده‌خۆنه‌وه‌ به‌ڵام كافاینی ناو چاو قاوه‌ به‌بڕی زۆر سه‌رئێشه‌ دروستده‌كات.

4- خوارنه‌وه‌ی بیبسی و كۆلای دایت یان به‌كارهێنانی حه‌پی شیرینكردن له‌ بری شه‌كر یان بنێشت جوین، چونكه‌ مادده‌ی ئه‌سپارتایمی تێدایه‌ كه‌ ده‌بێته‌ هۆی سه‌رئێشه‌.

5- ڕێجیمێك كه‌ كاربۆهیدراتی كه‌م تێدا بێت: وه‌ك ڕجێمی كیتۆجێنیك كه‌ خواردنه‌كانی پێكهاتووه‌ له‌ گۆشت و چه‌وری و پڕۆتین و میوه‌و نان و دانه‌وێڵه‌ی تێدا نیه‌.

6- هۆكاری تر كه‌ په‌یوه‌ندی به‌ ڕێجیمه‌وه‌ نیه‌، وه‌ك گرژبوونی ماسولكه‌كانی مل ، كه‌مخه‌وی، خه‌مۆكی، فشاری ده‌روونی و جه‌سته‌یی..

چاره‌سه‌ر:
* خواردنی میوه‌و سه‌وزه‌ له‌نێوان ژه‌مه‌كان
* خواردنه‌وه‌ی بڕێكی زۆرو پێویست له‌ ئاو به‌ به‌رده‌وامی له‌نێوان ژه‌مه‌كان
* خواردنی دانه‌وێڵه‌ ته‌واوه‌كان وه‌ك ئاردی بۆر به‌شێوه‌ی نانی تیری یان هه‌ورامی، پاقله‌مه‌نیه‌كان
* خواردنی ژه‌مه‌كان تایبه‌ت ژه‌می به‌یانی له‌كاتی خۆیدا، به‌ڵام كه‌متری لێ بخورێت
* دووركه‌وتنه‌وه‌ له‌ خواردنه‌وه‌ی بیبسی و كۆلای دایت و به‌كارهێنانی حه‌پی شیرینكردن له‌بری شه‌كر یان بنێشت جوینی بنێشتی كوردی بێ كێشه‌یه‌.
* نه‌خواردنه‌وه‌ی زیاتر له‌ دوو بۆ سێ كوپ له‌ چاو قاوه‌.
* نووستن بۆ ماوه‌ی (6-8 سه‌عات) شه‌وانه‌و دووركه‌وتنه‌ له‌ شه‌ونخونی

ئه‌گه‌ر پاش ئه‌م ڕێنمییانه‌ سه‌رئێشه‌كه‌ت به‌رده‌وامبوو، دیاره‌ هۆكاری تری هه‌یه‌و پێویسته‌ سه‌ردانی پزیشك بكه‌یت.


خاك – تانیا ئاواره‌



created by Avesta Group and powered by Microsoft Azure

Copyright © 2015 khaktv all rights reserved