6/10/2018 10:51 AM

ڕۆنی ئاژه‌ڵ باشتره‌ یان زه‌یتی ڕووه‌كی؟

ئه‌و پرسیارانه‌ی ڕۆژانه‌ ده‌كرێن بریتین له‌وه‌ی چ جۆره‌ ڕۆنێك باشه‌؟ چی به‌كاربێت واتا ڕۆنی ئاژه‌ڵ یان كه‌ره‌ی ڕووه‌كی یان زه‌یتی ڕووه‌كی؟ كامیان ده‌مانپارێزێت له‌ نه‌خۆشی؟ كام جۆری زه‌یتی ڕووه‌كی باشتره‌ له‌وانی تر؟

هه‌رچه‌نده‌ سه‌رچاوه‌و شوێن و شێوازی دروستكردن و پێكهاته‌كانی ناو ڕۆن و زه‌یت به‌هه‌موو جۆره‌كانیه‌وه‌ ڕوون نین، به‌ڵام بۆ زانینی باشترین جۆرو به‌كارهێنانی ڕۆن د.كامه‌ران ڕه‌سوڵ ژاژڵه‌یی پسپۆڕی زانستی خۆراك به‌ سایتی خاكی راگه‌یاند: باشترین جۆره‌كانی زه‌یت و ڕۆن بۆ چێشتلێنان به‌م بڕو شێوازه‌ به‌كاربهێنرێت زیانی كه‌مترو باشتره‌:

1- زه‌یتی ڕووه‌كی باشتره‌ له‌ڕووی زانستییه‌وه‌، به‌ مه‌رجێك تا بتوانرێت بڕی كه‌می لێ به‌كاربێت.
2- باشترین جۆری زه‌یتی ڕووه‌كی بریتین له‌ زه‌یتی گوێزی هیندی، زه‌یتی گه‌نمه‌شامی، زه‌یتی زه‌یتونی ئه‌سڵی (بۆ سووركردنه‌وه‌ به‌كارنایه‌ت)، زه‌یتی كه‌تان.
3- كه‌ره‌ی ڕووه‌كی یان ڕۆنی ڕووه‌كی زۆر زیانبه‌خشه‌.
4- كه‌ره‌ی خۆماڵی زۆرباشه‌ به‌مه‌رجێك ئاژه‌ڵه‌كه‌ به‌ گژوگیاو ئالیكی سروشتی به‌خێوكرابێت نه‌ك به‌ عه‌له‌فی دروستكراو و هۆڕمۆن و ئه‌نتی باێوتێك و پاشماوه‌ی خۆراكی مرۆڤه‌كان، پێویستیشه‌ تا بتوانرێت بڕی كه‌می لێ به‌كاربێت.
5- زه‌یتی گوڵه‌به‌ڕۆژه‌ كه‌م جۆری هه‌یه‌ باش بێت و زۆربه‌ی خراپه‌، چونكه‌ ڕێژه‌ی (ئۆمێگا6) بۆ (ئۆمێگا3) زۆر به‌رزه‌و چه‌ندجارێك ئه‌پاڵێورێته‌وه‌.
6- زه‌یتی كانولا زۆر خراپه‌، چونكه‌ ڕووه‌كه‌كه‌ جینه‌كانی ده‌ستكاری كراوه‌و هایدرۆجینی تێكه‌ڵ ئه‌كرێت و ڕێژه‌ی (ئۆمێگا6) بۆ (ئۆمێگا3) زۆر به‌رزه‌و چه‌ندجارێك ئه‌پاڵێورێته‌وه‌.
7- زه‌یتی سۆیا باشتره‌ زۆر كه‌م به‌كاربێت یان هه‌ر به‌كارنه‌هێنرێت، چونكه‌ ڕێژه‌ی (ئۆمێگا6) بۆ (ئۆمێگا3) به‌رزه‌و چه‌ندجارێك ئه‌پاڵێورێته‌وه‌.
8- بتوانرێت بۆ چێشتلێنان بڕی كه‌م زه‌یت به‌كاربێت و له‌ یه‌ك جار زیاتر بۆ سووركردنه‌وه‌ به‌كارنه‌یه‌ت و پێش به‌كارهێنانی سه‌یری مێژووی به‌سه‌رچوونی بكه‌ین.


خاك – تانیا ئاواره‌



created by Avesta Group and powered by Microsoft Azure

Copyright © 2015 khaktv all rights reserved