18/11/2018 09:16 AM

چه‌ره‌س دژی قه‌ڵه‌وی و نه‌خۆشییه‌كانی دڵه‌

توێژینه‌وه‌یه‌كی پزیشكی نوێی ئه‌مریكی ده‌ریخستووه‌ كه‌ رۆژانه‌ خواردنی بڕێكی كه‌م له‌ چه‌ره‌ساته‌كان، ئه‌گه‌ری قه‌ڵه‌وبوون و توشبوون به‌ نه‌خۆشییه‌كانی دڵ كه‌مده‌كاته‌وه‌.


توێژینه‌وه‌كه‌ له‌ زانكۆی هارڤاردی ئه‌مریكا ئه‌نجامدراوه‌و له‌ كۆنگره‌ی (كۆمه‌ڵه‌ی نه‌خۆشییه‌كانی دڵ له‌ ئه‌مریكا) پێشكه‌شكراوه‌ كه‌ له‌ شاری شیكاگۆ به‌ڕێوه‌ده‌چێت.

توێژه‌ره‌كان ده‌ڵێن: پێكهاته‌كانی نێو چه‌ره‌ساته‌كان دژی قه‌ڵه‌وین، ئه‌گه‌ر رۆژانه‌ ته‌نها 28 گرامیان لێبخورێت، هه‌روه‌ك به‌ چه‌ورییه‌ سوودبه‌خشه‌كان ده‌وڵه‌مه‌ندن كه‌ گرنگن بۆ پاراستنی ته‌ندروستی دڵ و لووله‌كانی خوێن.

توێژینه‌وه‌كه‌ سوودی له‌ داتا ته‌ندروستییه‌كانی 126 هه‌زار خانم و پیاو وه‌رگرتووه‌ كه‌ توشبووی نه‌خۆشییه‌ درێژخایه‌نه‌كان بوون و چوار ساڵ جارێك فۆڕمێكیان پڕكردووه‌ته‌وه‌ سه‌باره‌ت به‌ خواردنی رۆژانه‌ی چه‌ره‌ساته‌كان به‌گشتی و گوێز به‌تایبه‌تی.

له‌ ئه‌نجامدا ده‌ركه‌وت ئه‌وانه‌یان كه‌ رۆژانه‌ نزیكه‌ی 30 گرام چه‌ره‌س ده‌خۆن، كێشیان ته‌ندروستانه‌تره‌و ئه‌گه‌ری توشبوونیان به‌ نه‌خۆشییه‌كانی دڵ و لووله‌كانی خوێن كه‌متره‌.

توێژه‌ره‌كان ده‌ریشیانخستوه‌، جێگرتنه‌وه‌ی به‌شێك له‌ خواردنه‌كانی وه‌ك گۆشتی سوور، په‌تاته‌ی سووره‌وه‌كراو و سووكه‌ ژه‌مه‌ شیرینییه‌كان نزیكه‌ی 30 گرام چه‌ره‌س رێگه‌ له‌و زیادبوونه‌ هێواشه‌ ده‌گرێت كه‌ له‌گه‌ڵ چوونه‌ ته‌مه‌ندا له‌ كێشی جه‌سته‌دا رووده‌دات، هه‌روه‌ها ئه‌گه‌ری توشبوون به‌ نه‌خۆشییه‌كانی دڵ و لووله‌كانی خوێن كه‌مده‌كاته‌وه‌.

خاك - سیڤا ئازاد
دی ده‌بلیو




created by Avesta Group and powered by Microsoft Azure

Copyright © 2015 khaktv all rights reserved