18/12/2018 12:29 PM

هه‌رێم.. هه‌ڵمه‌تی كوتان دژی نه‌خۆشی ئیفلیجی منداڵان ده‌ستپێده‌كات

له‌ راگه‌یه‌نراوێكی وه‌زاره‌تی ته‌ندروستی حكومه‌تی هه‌رێمی كوردستاندا كه‌ كۆپییه‌كی بۆ سایتی خاك نێردراوه‌، تێیدا هاتووه‌ كه‌ له‌ به‌رواری 23-12-2018ـه‌وه‌ هه‌ڵمه‌تی نیشتمانی كوتان دژی نه‌خۆشی ئیفلیجی منداڵان ده‌ستپێده‌كات و ماوه‌ی 5 رۆژ به‌رده‌وامده‌بێت.

هه‌ر له‌ راگه‌یه‌نراوه‌كه‌دا چه‌ند رێنمایی و روونكردنه‌وه‌یه‌ك به‌ دایكان و باوكان دراوه‌ تاوه‌كو منداڵه‌كانیان بكوتن. ئه‌وانیش: 

*هه‌ڵمه‌تی كوتان دژی نه‌خۆشی ئیفلیجی منداڵان هه‌موو منداڵانی خوار 5 ساڵان ده‌گرێته‌وه‌و ڤاكسینه‌كه‌ش له‌ڕێگای ده‌مه‌وه‌ ده‌درێت به‌ منداڵه‌كه‌.

*دووباره‌بوونه‌وه‌ی كوتان دژی نه‌خۆشی ئیفلیجی منداڵان زامنی زیاتری ته‌ندروستی منداڵه‌كه‌ت و ژیانێكی ئاسووده‌یه‌ بۆ خۆت و خێزانه‌كه‌ت و رێگره‌ له‌به‌رده‌م دزه‌كردنی ئه‌م نه‌خۆشییه‌ بۆ عیراق و كوردستان.

*كوتانی ته‌نها منداڵێك گرنگه‌ بۆ قه‌ڵاچۆكۆدنی نه‌خۆشی ئیفلیجی منداڵان، ته‌نها دڵۆپێكیش له‌م ڤاكسینه‌ به‌نرخه‌ بۆ رزگاركردنی ژیانی مرۆڤێك.

*كوتانی پێشووتری منداڵه‌كه‌ت دژی نه‌خۆشی ئیفلیجی منداڵان رێگر نییه‌ له‌به‌رده‌م كوتانی ئه‌مجاره‌یدا.

*تیمه‌كانی كوتان دژی نه‌خۆشی ئیفلیجی منداڵان ماڵ به‌ماڵی كۆڵانه‌كانتان ده‌گه‌ڕێن و پێناسی تایبه‌تیان پێیه‌ له‌پێناوی پاراستنی ته‌ندروستی جگه‌رگۆشه‌كانتان و تكایه‌ هاوكاریان بكه‌ن.

له‌ كۆتایی راگه‌یه‌نراوه‌كه‌ی وه‌زاره‌تی ته‌ندروستیدا ئاماژه‌ به‌وه‌ش كراوه‌ كه‌ جگه‌رگۆشه‌كانمان مافی خۆیانه‌ ته‌ندروست و له‌شساغ بن، ده‌با ئێمه‌ش دڵسۆزانه‌ به‌ كوتان دژی نه‌خۆشی ئیفلیجی منداڵان ئه‌و ئایینده‌یه‌یان بۆ مسۆگه‌ر بكه‌ین.

خاك - تایبه‌ت



created by Avesta Group and powered by Microsoft Azure

Copyright © 2015 khaktv all rights reserved