له‌مكاتانه‌دا كه‌ ڕێجیم ده‌كه‌یت توشی كه‌مخوێنی ده‌بیت

زۆرن ئه‌و كه‌سانه‌ی ترسی ئه‌وه‌یان هه‌یه‌ توشی كه‌مخوێنی ببن له‌كاتی ڕێجیمدا، هه‌ڵبه‌ته‌ زۆربه‌ی ڕێجیمی زانستی و هاوسه‌نگ نابێته‌ هۆی كه‌مخوێنی، به‌ڵام هه‌ندێكجار كه‌مخوێنی له‌كاتی ڕێجیم یان پاش ڕێجیم ڕووده‌دات.

له‌وباره‌یه‌وه‌ د.كامه‌ران ڕه‌سوڵ ژاژڵه‌یی پسپۆڕی زانستی خۆراك و نه‌شته‌رگه‌ری گشتی به‌ سایتی خاكی راگه‌یاند:

له‌مكاتانه‌دا كه‌ ڕێجیم ده‌كه‌یت توشی كه‌مخوێنی ده‌بیت:

1- كه‌می ڤیتامین (B12) له‌ ئه‌نجامی نه‌خواردن یان كه‌م خواردنی ئه‌و خۆراكانه‌ی ده‌وڵه‌مه‌ندن وه‌ك گۆشت و مریشك و به‌روبوومه‌ ئاژه‌ڵییه‌كان.
2- كه‌می مادده‌ی زنك، ئاسن، فۆلیك ئه‌سید به‌هۆی نه‌خواردنی بڕی پێویست له‌و خۆراكانه‌ی ده‌وڵه‌مه‌ندن به‌و ماددانه‌.
3-نه‌خواردنی ڤیتامین و كانزاكان به‌شێوه‌ی حه‌پ یان گولاج یاخود خواردنی بڕی كه‌متر له‌ پێویست.
4-ڕێجیمی زۆر قورس و ناته‌ندروست به‌مه‌به‌ستی دابه‌زینی كێش به‌ خێرایی بێ سه‌رپه‌رشتی پزیشكی پسپۆڕ.
5-به‌رده‌وامبوون له‌سه‌ر یه‌ك جۆر له‌ ڕێجیمی خواردن بۆ ماوه‌ی چه‌ند مانگێك.
6-له‌ خانماندا به‌هۆی سوڕی مانگانه‌ یان بوونی گرێی منداڵدان.
7-ئه‌گه‌ر ئه‌و كه‌سه‌ پێشتر نه‌شته‌رگه‌ری بچوككردنه‌وه‌ی یان بڕینی گه‌ده‌ی بۆ كرابێت.
8-بوونی كه‌می مادده‌ی ئاسن، زنك، فۆلیك ئه‌سید یان ڤیتامین (B12) پێش ده‌ستپێكردنی ڕێجیم.

خاك – تانیا ئاواره‌