بیست و دووهه‌مین فێستیڤاڵی گه‌لاوێژ سازده‌كرێت

له‌ژێر دروشمی ره‌خنه‌ی ئازاد ده‌سته‌به‌ری كرانه‌وه‌یه‌ بیست و دووهه‌مین فێستیڤاڵی روناكبیری گه‌لاوێژ سازده‌كرێت و فێستیڤاڵه‌كه‌ سێ‌ رۆژ ده‌خایه‌نێت.

له‌ژێر دروشمی ره‌خنه‌ی ئازاد ده‌سته‌به‌ری كرانه‌وه‌یه‌ بیست و دووهه‌مین فێستیڤاڵی روناكبیری گه‌لاوێژ له‌ 18-4-2019 تا 20-4-2019 سازده‌كرێت، له‌ ئێستاشدا ده‌سته‌ی باڵا له‌میانی كۆبوونه‌وه‌كانیاندا سه‌رقاڵی داڕشتنی پلان و به‌رنامه‌ی فێستیڤاڵه‌كه‌ن له‌گه‌ڵ دیاریكردنی سه‌رجه‌م بڕگه‌و به‌شه‌كانی فێستیڤاڵ كه‌ به‌مشێوه‌یه‌:

1-بیست و دووهه‌مین فێستیڤاڵی گه‌لاوێژ له‌ڕۆژی پێنجشه‌ممه‌ رێكه‌وتی 18-4-2019 ده‌ستپێده‌كات و سێ‌ رۆژ ده‌خایه‌نێت.
2-له‌ رێكه‌وتی 5-1-2019 تا 15-2-2019 بابه‌ته‌كانی پێشبڕكێی فێستیڤاڵ له‌ (شیعر) و (چیرۆك) و (لێكۆڵینه‌وه‌) وه‌رده‌گیرێن له‌ڕێگه‌ی ئه‌م ئیمه‌یله‌وه‌  [email protected]
3-ته‌وه‌ری سه‌ره‌كی ئه‌مساڵی فێستیڤاڵ بریتییه‌ له‌ (بیره‌وه‌ری - بایۆگرافی له‌نێوان ئه‌ده‌ب و مێژوودا) كه‌ له‌ڕۆژی لێكۆڵینه‌وه‌ی عه‌ره‌بی و فارسیدا پێشكه‌ش ده‌كرێت.
4-هه‌روه‌ها پێشانگه‌ی كتێب و پێشانگه‌ی شێوه‌كاریش ده‌كرێنه‌وه‌ له‌گه‌ڵ پێشاندانی فیلمێكی دۆكیومێنتاری ده‌رباره‌ی چالاكییه‌كانی فێستیڤاڵ.
5-ژماره‌یه‌ك توێژه‌ری بیانی له‌ وڵاتانی عه‌ره‌بی و له‌ عیراق بانگهێشت ده‌كرێن بۆ پێشكه‌شكردنی لێكۆڵینه‌وه‌كانیان. له‌گه‌ڵ میوانانی كوردستان ئه‌وانه‌ی بابه‌ت و لێكۆڵینه‌وه‌یان هه‌یه‌، یان ئه‌وانه‌ی له‌ پێشبڕكێی فێستیڤاڵدا له‌لایه‌ن لیژنه‌كانه‌وه‌ ده‌ستنیشان ده‌كرێن.
6-بۆ به‌دواداچوون و ورده‌كاری زیاتر، ده‌توانن سه‌ردانی سایتی گه‌لاوێژ بكه‌ن: www.galawej.com

مه‌رجه‌كانی به‌شداربوون له‌ پێشبڕكێی بیست و دووهه‌مین فێستیڤاڵی گه‌لاوێژ:
1-بابه‌ته‌كان به‌ تایپكراوی و به‌ فۆنتی (unikurd) و به‌ سایزی (14) بنێرن.
2-شیعر له‌ پێنج (5) لاپه‌ڕه‌ زیاتر نه‌بێت.
3-چیرۆك له‌ دوو هه‌زار (2000) وشه‌ زیاتر نه‌بێت.
4-لێكۆڵینه‌وه‌ له‌ شه‌ش هه‌زار (6000) وشه‌ زیاتر نه‌بێت.
5-نابێت بابه‌ته‌كان له‌هیچ شوێنێك بڵاوكرابێتنه‌وه‌، نابێت پێشتر پێشكه‌شی هیچ ناوه‌ندێكی ئه‌كادیمی كرابێت.
6-ژماره‌ مۆبایل و ئه‌درێسی نووسه‌ره‌كه‌ له‌گه‌ڵ ناوه‌كه‌یدا دابنرێت.

خاك