2/4/2019 11:26 AM

هه‌ڵمه‌تی كوتان دژی نه‌خۆشی ئیفلیجی منداڵان ده‌ستپێده‌كات

له‌ راگه‌یه‌نراوێكدا كه‌ كۆپییه‌كی بۆ سایتی خاك نێردراوه‌، تێیدا  هاتووه‌ كه‌ هه‌ڵمه‌تی نیشتمانی كوتان دژی نه‌خۆشی ئیفلیجی منداڵان له‌ به‌رواری 7-4-2019 ده‌ستپێده‌كات و بۆ ماوه‌ی 5 رۆژ به‌رده‌وام ده‌بێت، هه‌موو ئه‌و منداڵانه‌ش ده‌گرێته‌وه‌ كه‌ ته‌مه‌نیان له‌ 5 ساڵ كه‌متره‌.

هه‌ر له‌و راگه‌یه‌نراوه‌دا چه‌ند رێنماییه‌ك بڵاوكراونه‌ته‌وه‌ كه‌ بریتین له‌:

*هه‌ڵمه‌تی كوتان دژی نه‌خۆشی ئیفلیجی منداڵان هه‌موو منداڵانی خوار 5 ساڵ ده‌گرێته‌وه‌و ڤاكسینه‌كه‌ش له‌ڕێگه‌ی ده‌مه‌وه‌ ده‌درێت به‌ منداڵ.

*دووباره‌بوونه‌وه‌ی كوتان دژی نه‌خۆشی ئیفلیجی منداڵان زامنی زیاتری ته‌ندروستی منداڵه‌كه‌ت و ژیانێكی ئاسووده‌یه‌ بۆ خۆت و خێزانه‌كه‌ت. هه‌روه‌ها رێگره‌ له‌به‌رده‌م دزه‌كردنی ئه‌م نه‌خۆشییه‌ بۆ عیراق و كوردستان.

*كوتانی ته‌نها منداڵێك گرنگه‌ بۆ قه‌ڵاچۆكردنی نه‌خۆشی ئیفلیجی منداڵان، ته‌نها دڵۆپێكیش له‌م ڤاكسینه‌ به‌نرخه‌ بۆ رزگاركردنی ژیانی مرۆڤێك.

*كوتانی پێشوتری منداڵه‌كه‌ت دژی نه‌خۆشی ئیفلیجی منداڵان رێگر نییه‌ له‌به‌رده‌م كوتانی ئه‌مجاره‌یدا.

*تیمه‌كانی كوتان دژی نه‌خۆشی ئیفلیجی منداڵان ماڵ به‌ماڵی كۆڵانه‌كانتان ده‌گه‌ڕێن و پێناسی تایبه‌تیان پێیه‌ له‌پێناوی پاراستنی ته‌ندروستی جگه‌رگۆشه‌كانتان تكایه‌ هاوكاریمان بكه‌ن.

*جگه‌رگۆشه‌كانمان مافی خۆیانه‌ ته‌ندروست و له‌شساغ بن، ده‌با ئێمه‌ش دڵسۆزانه‌ به‌ كوتان دژی نه‌خۆشی ئیفلیجی منداڵان، ئه‌و ئاینده‌یه‌یان بۆ مسۆگه‌ر بكه‌ین.

خاك - تایبه‌ت



created by Avesta Group and powered by Microsoft Azure

Copyright © 2015 khaktv all rights reserved