هاووڵاتیان لە جۆرێكی شەربەت ئاگاداردەكرێنەوە بەهۆی خراپ عەمباركردنییەوە، لیژنە هاوبەشەكانی قائیمقامیەتی سلێمانی دەست بەسەر بڕێكی زۆر شەربەتدا دەگرن و سەرۆكی لیژنەكە دایكان و باوكان ئاگاداردەكاتەوە. لە راگەیەنراوێكی لیژنە هاوبەشەكانی قائیمقامیەتی سلێمانی هاتووه.. عیسمەت محەمەد سەرۆكی لیژنەی كۆگاكانی سەر بە لیژنە هاوبەشەكانی قائیمقامیەتی سلێمانی رایگەیاند: بەهۆی خراپ عەمباركردن و گومانی خراپبوون و نەشیاوی بۆ خواردنەوە لە گۆكایەكی ناوچەی فەرەجئاوای شاری سلێمانی لیژنەكە دەستی بەسەر (700) كێس شەربەتدا گرتووه. وتیشی: شەربەتەكە لە جۆری (فستقە)ەو بە تامەكانی (پرتەقاڵ، قۆخ و هەنار) لە بەغداوە هاوردەكراوەو (16) هەزارو 800 دانەیە، لەلایەن لیژنە هاوبەشەكانەوە نمونەی رەوانەی بەڕێوەبەرایەتی تەندروستی سلێمانی كراوە بۆ پشكنین. راشیگەیاند: ئەمجۆرە شەربەتە لە دوكانی گەڕەكەكاندا زیاتر بە منداڵ دەفرۆشرێت، بۆیە پێویستە دایكان و باوكان زیاتر ئاگاداری ئەو خواردن و خواردنەوانەبن منداڵەكانیان دەیخۆن، رێگریان لێبكەن لە خواردن و خواردنەوەی خراپ و ماوەبەسەرچوو. عیسمەت محەمەد سەرۆكی لیژنەی كۆگاكانی سەر بە لیژنە هاوبەشەكانی قائیمقامیەتی سلێمانی راشیگەیاند: تەندروستی سلێمانی وەڵامی پشكنینەكەی بە نەشیاو بۆ خواردنەوە داوەتەوە، بۆیە بە فەرمانی قائیمقامی سلێمانی و لەلایەن لیژنەی لەناوبردنەوە لە ناوچەی دەرەوەی نیشتەجێبوونی هاووڵاتیان تەواوی شەربەتەكە لەناودەبرێت و خاوەنەكەشی روبەرووی رێكاری یاسایی دەكرێتەوە. خاك - راگەیاندنی قائیمقامیەتی سلێمانی
created by Avesta Group and powered by Microsoft Azure