دنیا سێ پیتە

دنیا سێ پیتە ناونیشانی کۆمەڵە چیرۆکێکی نوێی چیرۆکنووس و رۆماننووس مەحمود نەجمەدینە و بەمزوانە بڵاودەبێتەوە، ئەم بەرهەمە لەبڵاوکراوەکانی چاپەمەنی خانی و فەرهەنگ و سەرای هونەری ئەندێشە‌بۆچاپ و بڵاوکردنەوەی کتێب، لە سەقزە، کتێبەکە چووەتە چاپخانە و بڕیار وایە لە ئایندەیەکی نزیکدا لە رۆژهەڵاتی کوردستان بڵاو بێتەوە و پاشان لەباشووری کوردستان بڵاو دەبێتەوە. سەبارەت بەم کۆمەڵە چیرۆکە مەحمود نەجمەدین بەم شێوەیە بۆ سایتی خاک دوا، و گوتی: ئەم بەرهەمە كۆمەڵێك چیرۆكی ترسناكن، رووداوەكان بەكەشێكی ترسناك و فانتازیدا تێدەپەڕن، بابەتی ترس لە ئەدەبیاتی چیرۆک و رۆماندا لە نێوەندی ئەدەبی كوردی دەستی بۆ نەبراوە یان كەمتر كاری لەسەر كراوە، ئەم چیرۆكانە فەزایەكی ترسناكیان هەیە، چیرۆكی ترس و فانتازیایە. چیرۆكی ئەو مرۆڤانەیە كە لەدنیای واقیعەوە دەكەونە كەشێكی فانتازی ترسێنەرەوە. لەم چیرۆكانەدا كار لەسەر دوو شوێن كراوە، شوێنێك بوونی هەیە لەسەر زەمینی واقیع و شوێنێك لە دنیای خەیاڵە. مەملەكەتی خەیاڵە ترسێنەر و فانتازییەكانە پاڵەوانەكان بەرەو دنیای بوونەوەری نامۆ و نەدیتراو دەڕۆن. لەپاڵ ئەو مرۆڤە ئاساییانەدا چەندین كارەكتەری فانتازی لەم چیرۆکانەدا هەیە، رۆڵ دەگێڕن. هاوشێوەی مرۆڤی دنیای واقیع ئەوانیش پانتاییەكیان لە گێڕانەوە داگیركردووە و لەهەندێك چیرۆكدا بەسەر كەسایەتییە راستەقینەكاندا زاڵن. 
ئەم بەرهەمە لە نۆ چیرۆك پێك دێ كە ئەمە ناونیشانەكانیانە: "چەكەرداسی قزە، كەللەزراو، بەڵای سەرشین، بۆرچیل و مۆرە، منداڵەكەی زامبیا، كفن دڕ، بە لاقی مۆفەرەح رادەكات، دڵم دەلەرزی، سیدرا رۆیشت و دنیا سێ پیتە" ئەم کۆمەڵە چیرۆکە لەبڵاوکراوەکانی چاپەمەنی خانییە لە سەقز، پیتچنی وپەڕازێن کاری کاک ئومێد موقەددەس و رووبەرگ کاری خاتوو نەسرین کاکی یە. بەقەبارەی نیو ئەیفۆڕ، لەدووتوێی 163 لاپەڕەدایە. جا لێرەوە دەمەوێت سوپاسی هەموو دۆستان و هاوڕێیانی خانی بکەم بە تایبەت کاک ئازاد ماندووبوون بەم کارەوە. 

نووسەری و رۆژنامەنووس مەحمود نەجمەدین چەند بەرهەمێكی دیكەی بڵاوبوونەتەوە لەوانە" رۆمانی پیاوەكان بە خەونیش نەگەڕانەوە، كۆمەڵە چیرۆكی پاسەكەی گورون، كۆمەڵە چیرۆكی هاوشێوەكانی سەلیم جەودەت. چەند بەرهەمێكی دیكەشی ئامادەن بۆ چاپ.

خاك