زیانه‌كانی نه‌خواردنی ژه‌می به‌یانیانی منداڵان

د.كامه‌ران ره‌سوڵ ژاژڵه‌یی پسپۆڕی زانستی خۆراك و نه‌شته‌رگه‌ری گشتی و ئه‌ندامی پڕۆڤیشناڵی كۆلیژی ئه‌مریكی بۆ زانستی خۆراك له‌ تۆڕی كۆمه‌ڵایه‌تی فه‌یسبوك بابه‌تێكی بڵاوكردووه‌ته‌وه‌ سه‌باره‌ت به‌ مه‌ترسییه‌كانی نه‌خواردنی ژه‌می به‌یانیان بۆسه‌ر دڵ و خوێنبه‌ره‌كانی منداڵان.

له‌ بابه‌ته‌كه‌یدا، د.كامه‌ران ده‌ڵێت: به‌پێی تازه‌ترین لێكۆڵینه‌وه‌ی زانستی نه‌خواردنی ژه‌می به‌یانی له‌ منداڵان مه‌ترسی گه‌وره‌ی هه‌یه‌ له‌سه‌ر دڵ و بۆری خوێنه‌كان، چونكه‌ ده‌بێته‌ هۆی به‌رزبوونه‌وه‌ی ئاستی كۆلیستڕۆڵی خراپ و یورێك ئه‌سیدو زیادبوونی به‌رگری جه‌سته‌ دژی ئه‌نسۆلین، هه‌روه‌ها خواردنی ژه‌می ناته‌دروست له‌ به‌یانیدا هه‌مان مه‌ترسی هه‌یه‌ ، بێگومان پێشتر چه‌ندین زیانی نه‌خواردنی ژه‌می به‌یانی له‌ منداڵان ئاشكراكراوه‌ كه‌ گرنگترینینان ئه‌مانه‌ن:

*دابه‌زینی ئاستی فێربوون و زیره‌كی و نزمبوونه‌وه‌ی نمره‌كانی له‌ خوێندندا.
*زیادبوونی ئه‌گه‌ری كه‌می مادده‌ی ئاسن و كانزاو ڤیتامینه‌كان.
*زیادبوونی ئه‌گه‌ری زۆری كێش و قه‌ڵه‌وی له‌ ته‌مه‌نی منداڵی و له‌ داهاتووشدا.
*لاوازی و كه‌می كێش له‌و منداڵانه‌ی ئیشتهایان كه‌مه‌و ژه‌مه‌كانی تریش كه‌م خۆراك ئه‌خۆن.
*دواكه‌وتنی گه‌شه‌ی منداڵ و كورتی باڵا.
*هیلاكی و شه‌كه‌تی و هه‌ستكردن به‌ ته‌مه‌ڵی به‌ به‌رده‌وامی.
*تێكچوونی میزاج و دڵته‌نگی و گۆشه‌گیری.
*زیادبوونی ئه‌گه‌ری توشبوون به‌ نه‌خۆشی شه‌كره‌و شێرپه‌نجه‌ له‌ داهاتوودا.
*كه‌مبوونه‌وه‌ی چالاكی و جوڵه‌و ئاره‌زووی وه‌رزش.

هه‌ر له‌و بابه‌تیدا د.كامه‌ران ئاماژه‌ی به‌وه‌ كردووه‌، ژه‌می به‌یانی پێویسته‌ پێش سه‌عات 8:15 خورابێت له‌ زۆربه‌ی ڕۆژه‌كانی ساڵ و له‌ وه‌رزی هاوینیشدا پێش سه‌عات 8:45 خوله‌كی به‌یانی خورابێت.

خاك - ئا/ لانه‌ كاشان