كەشناسی هۆشداری دەدات لە هاتنی شەپۆلێكی باران و بەفربارین بۆ هەرێمی كوردستان. لە راگەیەنراوێكی بەڕێوەبەرایەتی گشتی كەشناسی و بومەلەرزەزانی هەرێم راگەیەنراوە، چوارشەممە 25-12-2019 نزمە پاڵەپەستۆی دەریای ناوەڕاست كاریگەریيەكەی درێژدەبێتەوە بۆ سەر ناوچەكەمان. سەرەتا لەسەر ناوچە شاخاوییەكانی پارێزگای دهۆك بارانبارین دەستپێدەكات پاشان لە شەودا لە زۆربەی ناوچەكان بارانبارین دەبارێت. كەشناسی ئاماژەی بەوەش كردووە: پێنجشەممە 26-12-2019 تەواوی هەرێم دەكەوێتە ژێر كاریگەری ئەم شەپۆلە بارانبارینەوەو ئاستی باران مامناوەند دەبێت، رۆژی هەینیش بارانبارین بەردەوامی دەبێت و پلەكانی گەرما روو لە نزمبوونەوە دەكەن و هەندێكجار خێرايی با زیاد دەكات و بەفریش لەسەر ناوچە شاخاوییە بەرزەكان دەبارێت. راشگەیەنراوە: كاریگەری ئەم شەپۆلە رۆژی شەممەی داهاتوو كۆتایی پێدێت. خاك - راگەیاندنی كەشناسی هەرێم
created by Avesta Group and powered by Microsoft Azure