20/5/2020 11:41 PM

نیشانه‌و هۆكارو شێوازی چاره‌سه‌ركردنی باڵا كورتی

كورتی باڵا یان كورته‌ باڵایی، به‌وه‌ پێناسه‌ ده‌كرێت كه‌ باڵای مرۆڤ كه‌متر بێت له‌ باڵای ئاسایی به‌گوێره‌ی ته‌مه‌ن و ڕه‌گه‌زو كێش، ده‌توانرێت ده‌ستنیشان بكرێت كاتێك منداڵی كه‌متر بێت به‌گوێره‌ی چارتی گه‌شه‌ی منداڵ.
باڵای مرۆڤ له‌ ته‌مه‌نی (25 ساڵ) ده‌وه‌ستێت، به‌ڵام زۆرینه‌ی كچان له‌ (17 ساڵ و نیو) و كوڕان له‌ (18 ساڵ)دا گه‌شه‌ی باڵایان ئه‌وه‌ستێت.

له‌باره‌ی هۆكاره‌كانی كورته‌ باڵایی و نیشانه‌و‌ شێوازه‌كانی چاره‌سه‌رییه‌وه‌، د.كامه‌ران ره‌سوڵ ژاژڵه‌یی پسپۆڕی زانستی خۆراك و نه‌شته‌رگه‌ری گشتی بابه‌تێكی بڵاوكردووه‌ته‌وه‌و گرنگترین هۆكاره‌كانی كورته‌ باڵایی  ڕوونكرد‌ووه‌ته وه‌، ئه‌وانیش:
1-بۆماوه‌یی: ئه‌گه‌ر منداڵه‌كه‌ باوك یان دایكی یاخود هه‌ردووكیان كورته‌باڵا بوون، ئه‌وا شتێكی زۆر چاوه‌ڕوانكراوه‌ ئه‌و منداڵه‌ش باڵای كورت بێت.

2-هۆكاری نه‌خۆشی:
-به‌دخۆراكی
-كه‌می ڤیتامین دی و ئێسكه‌نه‌رمه‌
-كه‌می هۆڕمۆنی گه‌شه‌ یان سستی یا نه‌بوونی هۆڕمۆنی گه‌شه‌
-شه‌ونخوونی و كه‌مخه‌وی و تێكچوونی خه‌و
-نه‌خۆشی درێژخایه‌ن وه‌ك ڕه‌بۆو شه‌كره‌و سستی و وه‌ستانی گورچیله‌و هه‌ندێك نه‌خۆشی تری گورچیله‌و سكچوونی به‌رده‌وام و هه‌وكردنی كۆئه‌ندامی هه‌رس.
-هه‌ندێك جۆری كه‌مخوێنی وه‌ك سالاسیمیاو كه‌مخوێنی سكه‌ڵ سێڵ.
-قه‌ڵه‌وی له‌ منداڵ
-كۆرپه‌ی ناكام و بوونی به‌دخۆراكی له‌ دایكدا كاتی سكپڕی.
-نه‌خۆشی بۆماوه‌یی وه‌ك كۆنیشانه‌ی تێرنه‌رو داون و نه‌خۆشی كوشینگ و گه‌شه‌ نه‌كردن و پوكانه‌وه‌ی غوده‌ی نوخامی.
-سستی غوده‌ی ده‌ره‌قی
-هۆكاری سایكۆلۆژی وێنه‌ی بێبه‌شبوون له‌ سۆزی دایك و باوك یان له‌ده‌ستدانی دایك یان باوك یان كه‌سێكی نزیك، هه‌روه‌ها بوونی سترێسی زۆرو به‌رده‌وام.
-به‌كارهێنانی ده‌رمانی ستیرۆیده‌كان وه‌ك دیكسۆن و كۆرتیزۆن
-نه‌خۆشی بۆماوه‌یی بڕبڕه‌كان و نه‌رمی كڕكراگه‌و شه‌له‌ل ده‌ماغ و نه‌بوونی ته‌ركیز كه‌ هه‌ندێكجار وه‌ك ئۆتیزم ده‌ستنیشان ده‌كرێت.

3-كورته‌باڵایی جه‌سته‌یی: له‌م حاڵه‌ته‌دا ئێسكی منداڵه‌كه‌ گه‌شه‌ ناكات وه‌ك پێویست و له‌ ئێسكی منداڵێكی ته‌مه‌ن بچوكتر له‌ ته‌مه‌نی خۆی ده‌چێت و دوای باڵغبوون باڵای منداڵه‌كه‌ زیاد ده‌كات.

نیشانه‌كانی كورته‌باڵایی:
كورته‌ باڵایی به‌وه‌ ده‌ناسرێته‌وه‌ كه‌ باڵای مرۆڤ كه‌متر بێت له‌ باڵای ئاسایی به‌گوێره‌ی ته‌مه‌ن و ڕه‌گه‌زو كێش و ده‌توانرێت ده‌ستنیشان بكرێت كاتێك منداڵی كه‌متر بێت به‌گوێره‌ی چارتی گه‌شه‌ی منداڵ یاخود به‌رواد بكرێت به‌ لیستی نموونه‌ی باڵا به‌گوێره‌ی ته‌مه‌ن و ڕه‌گه‌ز.

هه‌روه‌ها پزیشك ده‌توانێت به‌ شێوه‌یه‌كی گشتی باڵای چاوه‌ڕوانكراو و ئاسایی ئه‌و كه‌سه‌ له‌كاتی پێگه‌شتندا به‌ چه‌ند هاوكێشه‌یه‌ك ده‌ستنیشان بكات كه‌ پشت به‌ باڵای باوك و دایكی منداڵه‌كه‌ ده‌به‌ستێت.

ئه‌و فه‌حسانه‌ی پێویسته‌ له‌كاتی كورتی باڵاییدا ئه‌نجام بدرێت:
-فه‌حسی هۆڕمۆنی گه‌شه‌ كه‌ پێویسته‌ دوو جار خوێن وه‌ربگێرێت كه‌ یه‌ك سه‌عات له‌نێوانیاندا بێت له‌گه‌ڵ هۆڕمۆنی گه‌شه‌ی له‌ ئه‌نسۆلین چوو.
-فه‌حسی غوده‌ی ده‌ره‌قی
-فه‌حسی ڕێژه‌ی خوێن و ڤیتامین دی و سی و بی و كانزاكان وه‌ك كالسێوم و مه‌گنسێوم و زنك و ئاسن و پڕۆتین.
-فه‌حسی میزو گورچیله‌و پیسایی
-فه‌حسی شه‌كره‌
-تیشكی ئێسك بۆ ده‌ستی چه‌پ و بڕبڕه‌كان و هه‌ندێك حاڵه‌ت ڕه‌نگه‌ سۆنارو تیشكی ته‌نووری بوێت.
-فه‌حسی كرۆمۆسۆمی تایبه‌ت به‌ نه‌خۆشی بۆماوه‌یی له‌كاتی بوونی ئه‌گه‌ری بوونی ئه‌و نه‌خۆشیانه‌.

شێوازی چاره‌سه‌ركردنی كورتی باڵا:
1-ده‌ستنیشانكردنی جۆرو هۆكاری كورته‌ باڵایی و چاره‌سه‌ركردنی هۆكاره‌كانی ئه‌گه‌ر بتوانرێت.
2-پێدانی هۆڕمۆنی گه‌شه‌ له‌كاتی نه‌بوون یان كه‌می هۆڕمۆنی گه‌شه‌ كه‌ له‌ڕێگه‌ی ده‌رزی ژێرپێسته‌وه‌ ده‌درێت به‌ منداڵه‌كه‌ ڕۆژانه‌و پزیشكی پسپۆڕ دیاری ده‌كات و هه‌ندێكجار پێكهاتووه‌كانی هۆڕمۆنی گه‌شه‌ به‌شێوه‌ی حه‌پ یان قه‌تره‌و به‌خاخه‌وه‌ به‌كارده‌هێنرێت.
3-خۆركی ته‌ندروست و ده‌وڵه‌مه‌ند به‌ پڕۆتین و ڤیتامین دی و سی و بی و كانزاكان وه‌ك كالسێوم و مه‌گنسێوم و زنك و ئاسن.
4-وه‌رزشكردنی به‌رده‌وام رۆژانه‌
5-ڕێكردنه‌وه‌ی خه‌و و دووركه‌وتنه‌وه‌ له‌ شه‌ونخونی

بۆ زانینی ئاستی باڵای نموونه‌یی به‌ (سانتیمه‌تر) به‌گوێره‌ی ته‌مه‌ن و ڕه‌گه‌ز سه‌یری بابه‌تی لیستی ئاستی باڵای نموونه‌یی بكه‌ له‌م وێنانه‌دا.

خاك – ئا/ لانه كاشان




زۆرترین خوێندراوە



created by Avesta Group and powered by Microsoft Azure

Copyright © 2015 khaktv all rights reserved