وه‌زاره‌تی خوێندنی باڵاو توێژینه‌وه‌ی زانستی بۆ ساڵی چواره‌م ڕیزبه‌ندی نیشتیمانی زانكۆكانی كوردستان ڕاده‌گه‌يه‌نێت. لێژنه‌ی باڵای ڕیزبه‌ندی نیشتیمانی زانكۆكانی كوردستان له ڕاگه‌یه‌نراوێكدا ڕایده‌گه‌یه‌نێت: ڕیزبه‌ندی نیشتیمانی زانكۆكان یه‌كێك له پڕۆژه گرنگ و كاریگه‌ره‌كانی وه‌زاره‌تی خوێندنی باڵاو توێژینه‌وه‌ی زانستی، چونكه جێبه‌جێكردنی ئه‌و پڕۆژه‌یه له ماوه‌ی ڕابردوو كاریگه‌ری زۆری خستۆته‌سه‌ر پێشكه‌وتنی زانكۆكان و ئاشناكردنی زانكۆكان به كۆمه‌ڵێك به‌های نوێ. له ڕاگه‌یه‌نراوه‌كه‌دا ئه‌وه‌ش هاتووه: له ئێستادا كارووباره ته‌كنیكی و تایبه‌ته‌كانی په‌یوه‌ست به ڕێزبه‌ندی نیشتیمانی زانكۆكان به شێوه‌یه‌كی سه‌ركه‌وتوو به‌ڕێوه‌ده‌چێت و واش بڕیاره ئه‌مساڵیش له ناوه‌ڕاستی مانگی ئه‌یلول بۆ جاری چواره‌م ڕیزبه‌ندی نیشتیمانی زانكۆكان ڕابگه‌یه‌نرێت. لێژنه‌ی باڵای ڕیزبه‌ندی نیشتیمانی زانكۆكانی كوردستان دووپاتیشی ده‌كاته‌وه: پرۆسه‌ی ڕیزبه‌ندی زانكۆكان پشت به (8) پێوه‌ری سه‌ره‌كی و (47) پێوه‌ری لاوه‌كی ده‌به‌ستێت، جێبه‌جێكردنی پڕۆژه‌ی ڕیزبه‌ندی نیشتیمانی زانكۆكان گۆڕانكاری زۆر گرنگی له‌گه‌ڵ خۆی هێنا، كلتووری كێبڕكێی زانستی تۆخكرده‌وه‌و پێوه‌رو ستانداردو كلتووری نوێی هێنایه ناو ئه‌زمونی ئه‌كادیمیای كوردستان. خاك - به‌ڕێوه‌به‌رایه‌تی ڕاگه‌یاندنی وه‌زاره‌ت
created by Avesta Group and powered by Microsoft Azure