سوود و زیانه‌كانی گێلاس

د.كامه‌ران ره‌سوڵ ژاژڵه‌یی پسپۆڕی زانستی خۆراك بابه‌تێكی بڵاوكردووه‌ته‌وه‌ كه‌ تێیدا گرنگترین سووده‌ ته‌ندروستییه‌كانی گێلاسی روونكردوه‌ته‌وه‌، هه‌مانكات زیانه‌كانی و بڕی ڕێگه‌پێدراو ڕۆژانه‌ ئاماژه‌ی پێكراوه‌.

گرنگترین سووده‌ ته‌ندروستییه‌كانی گێلاس:
1-به‌هێزكردنی كۆئه‌ندامی به‌رگری له‌ش و ڕێگریگرتن له‌ هه‌موو نه‌خۆشییه‌كان و زوو چاكبوونه‌وه‌و ساڕێژبوونی برین به‌ خێرایی.
2-خۆپاراستن له‌ شێرپه‌نجه‌ چونكه‌ ده‌وڵه‌مه‌نده‌ به‌ مادده‌ دژه‌ئۆكسانه‌كانی وه‌ك كارۆتێنه‌كان، ڤیتامین سی، ڤلاڤینویده‌كان.
3-ڕێگریكردن له‌ پیربوون و نه‌خۆشییه‌كانی به‌ساڵاچووان.
4-پاراستنی ته‌ندروستی چاو و خۆپاراستن له‌ كوێری و پوكانه‌وه‌ی ڕه‌شێنه‌ی چاو و وشكبوونه‌وه‌ی و ئاوی سپی و ئاوی ڕه‌ش.
5-كه‌مكردنه‌وه‌ی نه‌خۆشییه‌كانی دڵ و به‌رزی فشاری خوێن و چه‌ورییه‌ خراپه‌كانی ناو خوێن.
6-پاراستنی ته‌ندروستی مێشك و كۆئه‌ندامی ده‌مارو به‌سووده‌ له‌ چاره‌سه‌ركردنی نه‌خۆشی ئه‌لزه‌هایمه‌رو پاركنسۆن و هیلاكی به‌رده‌وام و دڵه‌ڕاوكێی زۆر.
7-باشتركردنی كۆئه‌ندامی هه‌رس و كه‌مكردنی قه‌بزی.

زیانه‌كانی گێلاس:
1-هه‌ندێك كه‌س كه‌ حه‌ساسیه‌تیان به‌ گێلاس هه‌یه‌، پێویسته‌ نه‌یخۆن؛ له‌ نیشانه‌كانی: سووربوونه‌وه‌و خورانی پێست و ده‌ركه‌وتنی په‌ڵه‌ی سوور، ته‌نگه‌نه‌فه‌سی، به‌ زه‌حمه‌ت قووتدانی پاروو، سووربوونه‌وه‌ی چاو.
2-خواردنی بڕێكی زۆر ڕۆژانه‌و به‌ به‌رده‌وامی ڕه‌نگه‌ ببێته‌ هۆی زیادكردنی غازات و ئاوسانی سك و پێچ هاتن به‌ سكدا.

بڕی ڕێگه‌پێدراو ڕۆژانه‌: یه‌ك كووپ بۆ یه‌ك كووپ و نیو ڕۆژانه‌ بۆ كه‌سێكی ته‌واو پێگه‌یشتوو.

خاك - ئا/ لانه‌ كاشان