نابێت منداڵان ئه‌م خواردنانه‌ زۆر بخۆن

د.كامه‌ران ره‌سوڵ ژاژڵه‌یی پسپۆڕی زانستی خۆراك بابه‌تێكی بڵاوكردووه‌ته‌وه‌ سه‌باره‌ت به‌ دیاریكردنی چه‌ند خۆراكێك كه‌ نابێت له‌لایه‌ن منداڵانه‌وه‌ زۆر بخورێن و تێیدا چه‌ندین زانیاری گرنگی خستوه‌ته‌ڕوو.

د.كامه‌ران له‌ بابه‌ته‌كه‌یدا ئاماژه‌ی به‌وه‌ كردووه‌ كه‌ كۆمه‌ڵێك خواردن ده‌بنه‌ هۆی دابه‌زینی ئاستی زیره‌كی و بیركردنه‌وه‌.

روونیشیكردوه‌ته‌وه‌، جۆره‌كانی خواردن و سیستمی خۆراكی ته‌ندروست ڕۆڵێكی گه‌وره‌ی هه‌یه‌ له‌ گه‌شه‌ی مێشك و كۆئه‌ندامی ده‌مارو پاراستنی ته‌ندروستی ده‌ماغ؛ لێكۆڵینه‌وه‌ زانستییه‌كان ده‌ریانخستووه‌ كه‌ كۆمه‌ڵێك خواردن كاریگه‌ری خراپی هه‌یه‌ بۆ مێشكی منداڵان و ئاستی زیره‌كی و توانای بیركردنه‌وه‌ به‌تایبه‌ت بۆ منداڵانی كه‌متر له‌ شه‌ش ساڵ.

ئه‌و پزیشكه‌ ده‌شڵێت: ئه‌و خۆراكانه‌ی نابێت زۆر بدرێن به‌ منداڵان (یان باشتره‌ زۆر كه‌می لێبخۆن) بریتین له‌:
1-فاست فود: وه‌ك گه‌س و هه‌مبه‌رگرو پیتزا.
2-برنجی سپی و ئه‌و خواردنانه‌ی له‌ ئاردی سفر دروستده‌كرێن: وه‌ك نان و سه‌موونی سپی؛ برنجی قاوه‌یی و بۆرو ئاری بۆر زۆر باشتره‌.
3-چپس.
4-ئیندۆمی و مه‌عكرۆنی و باستا.
5-ئه‌و خواردنه‌ی بڕێكی زۆر خوێی سودیۆم و ڕه‌نگی دروستكراو و مه‌وادی حافزه‌یان تێدایه‌.
6-خواردنه‌وه‌ گازیه‌كان چونكه‌ مادده‌ی كافاین و شه‌كریان تێدایه‌، هه‌روه‌ها خواردنه‌وه‌ وزه‌به‌خشه‌كان.
7-گۆشتی دروستكراو: وه‌ك گۆشتی قوتوو و ستیك و كه‌نتاكی و باسترمه‌.
8-چه‌ورییه‌ چڕه‌كان: وه‌ك ڕۆنی ئاژه‌ڵ و به‌زو چه‌وری گۆشتی سوورو پێستی مریشك و كه‌ره‌.
9-شیرینی و ئه‌و خواردنانه‌ی شه‌كری دروستكراویان زۆر تێدایه‌.

خاك - ئا/ لانه‌ كاشان