نەخۆشیی MS نەخۆشییەکی مەترسیدارە چونکە پەیوەندی نێوان مێشک و جەستە دەشێوێت و هەر بۆیە هاوسەنگی جەستە تێک دەچێت، ماندوویەتی کەسەکە زۆر دەبێت و هێزی چاوەکانی کەم دەبێتەوە. لەئێستادا نزیکەی 2.3 ملیۆن کەس لە جیهاندا لەگەڵ ئەم نەخۆشییە دەژین و هێشتا چارەسەرێکی یەکلاکەرەوەی بۆ نەدۆزراوەتەوە. هەروەها لەوانەیە دوو کەسی تووشبوو نیشانەی جۆراوجۆریان هەبێت بەڵام لە هەندێک خاڵدا هاوبەشن. زیاتر لە 80٪ـی تووشبووانی MS هەستەوەریان بەنیسبەت گەرماوە هەیە و بە هۆی بەرزبوونەوەی پلەی گەرمی تەنانەت بە رادەیەکی کەم، لەگەڵ ئازار و گرفتێکی زۆر رووبەڕوو دەبنەوە. تووشبووانی MS هەروەها کێشەی بینین، کێشەی زەینی و ماندوویەتیی لەڕادەبەدەریش ئەزموون دەکەن. ئەگەرچی زۆرینەی تووشبووانی MS بە هۆی گەرماوە ئازار دەبینن بەڵام 20٪ـیان بە هۆی سەرماوە حاڵیان خراپ دەبێت. ئازارەکانی ماسولکە، هەستکردن بە گرژبوونی ئەندامەکانی جستە و رەقبوونی ماسولکەکان بەشێکن لەو نیشانانەی لەم 20٪ـەدا دەردەکەون. بەپێی بۆچوونی پسپۆڕان سەرما رێگری دەکات لە خێرایی گواستنەوەی پەیامە عەسەبییەکان لەنێوان خانەکانی مێشکدا و ئەوەش کارکردەکانی مێشک و جەستە تێک دەدات. ئاگاداربوون لەوەی کە تووشبووەکە بە هۆی گەرما یان سەرما دەکەوێتە دۆخێکی نالەبارەوە، دەتوانێ یاریدەدەر بێت بۆ پاراستنی کەسەکە و کۆنتڕۆڵی نەخۆشییەکە.
سەرچاوە: bestlifeonline
created by Avesta Group and powered by Microsoft Azure