راپۆرتێك له‌باره‌ی ره‌وشی رۆژنامه‌نووسانی سلێمانی بڵاوده‌كرێته‌وه‌‌

بۆ 120 هه‌مین ساڵاۆژی رۆژنامه‌گه‌ریی كوردی

ته‌مه‌نی رۆژنامه‌گه‌ریی كوردی ده‌بێته‌ 120 ساڵ، ئه‌م ژماره‌یه‌ كه‌م نیه‌ بۆ داهێنان و نوێخوازی و باشتركردنی گوزه‌رانی میدیاكاران، كه‌چی هێشتا وێڵین به‌دوای پێناسێكی گونجاودا بۆ میدیاكه‌مان، هێشتا توێژی رۆژنامه‌نووسان له‌ هه‌ژارترینه‌كانی كۆمه‌ڵگه‌ن، هێشتا میدیاكان له‌ به‌رژه‌وه‌ندی خاوه‌نه‌كانیان وه‌ك به‌رهه‌می تایبه‌ت و تاكه‌كه‌س به‌كار ده‌هێنرێن..

*پێنج كه‌یسی تیرۆركردنی میدیاكاران به‌كراوه‌یی ماونه‌ته‌وه‌.

*میدیاكار له‌ چه‌ندین لاوه‌و به‌چه‌ندین شێواز ده‌چه‌وسێنرێته‌وه‌.

*گرێبه‌ستی كاركردن ته‌نها له‌به‌رژه‌وه‌ندیی خاوه‌نكاره‌..

*زانیاری وه‌ك پێویست به‌ده‌ست میدیاكار ناگات.

*په‌یوه‌ندی نێوان میدیاكارو هێزه‌كانی ناوخۆ دۆستانه‌ نیه‌.

*موچه‌ له‌كاتی خۆیداو به‌دیاریكراوی ناگاته‌ گیرفانی میدیاكار.

*بڕی داشكێنراو له‌موچه‌ی میدیاكار هه‌ڕه‌مه‌كیه‌و به‌ یاسا رێكنه‌خراوه‌.

*مه‌حسوبیه‌ت و مه‌نسوبیه‌ت و جیاوازی له‌ دامه‌زراندن و كاركردندا هه‌یه‌.

*سه‌عاته‌كانی كاركردن له‌هه‌فته‌دا له‌ستانداردی جیهانی زۆر زیاترن..

*ژنان و كچان له‌ژینگه‌و كه‌شوهه‌وایه‌كی میدیای نه‌گونجاودا كارده‌كه‌ن.

*هه‌ڕه‌شه‌ی ده‌ركردن و نانبڕاو كردن مۆته‌كه‌یه‌كه‌ به‌سه‌ر میدیاكاره‌وه‌.

*نه‌بوونی یاسایه‌كی كاركردنی گشتگیر كه‌ ماف و ئیمتیازانی میدیاكار بپارێزێت.

*میدیا له‌هه‌ندێك شوێندا وه‌ك ئامێرێكی ئه‌شكه‌نجه‌ له‌جه‌سته‌ی مێیینه‌دا كارده‌كات.

*له‌هه‌ڵمه‌ته‌كه‌كانی هه‌ڵبژاردندا هه‌ندێك كه‌ناڵ ده‌بنه‌ كارتی تۆقاندنی كۆمه‌ڵگه‌.

*تیمه‌كانی روماڵ هه‌ڕه‌شه‌ی هاووڵاتیانیش ده‌یانگرێته‌وه‌.

*بژێوی قورسی ژیان وای كردوه‌ هه‌ندێك له‌میدیاكاران وه‌رزانه‌ كه‌ناڵه‌كان بگۆڕن.

*گوزه‌ران وایكردوه‌ هه‌ندێك میدیاكار له‌شوێنێكدا كاربكه‌ن له‌ناخدا هاوجۆرو هاوئایدیا نه‌بن.

*هه‌ڵمه‌ته‌كانی كه‌مكردنه‌وه‌و ده‌ركردنی میدیاكاران له‌كه‌ناڵه‌كاندا به‌ میزاجی به‌رپرسه‌كانه‌.

*كچانی میدیاكار له‌هه‌ندێ جێگادا له‌به‌رده‌م هه‌ره‌شه‌ی جۆراوجۆردان.

*شه‌ڕی ده‌روونی و برسی كردن له‌كه‌ناڵه‌كان هێشتا به‌جۆرێك له‌جۆره‌كان هه‌یه‌.

*زۆرترین ژماره‌ی كه‌ناڵمان هه‌یه‌ به‌ڵام كه‌مترین فیدباك و كاریگه‌ی دروست ده‌كه‌ن.

*له‌دوای 120 ساڵ هێشتا خه‌ون به‌كه‌ناڵێكی نیشتمانیه‌وه‌ ده‌بینین.

*په‌یامی میللـه‌تێكمان به‌ كه‌رتكراوی و پچڕپچڕ یش نه‌گه‌یاندوه‌ به‌ دراوسێ و بێگانه‌كان.

*له‌سه‌ر ئه‌م هه‌ساره‌دا تاكه‌ میللـه‌تێكین میدیاكه‌مان ته‌نها بۆخۆمان بێت..

*مه‌سجی میدیای كوردی ناگاته‌ ده‌ره‌وه‌ی بازنه‌یه‌كی داخراو و بچكۆله‌ی باشووری كوردستان..

*ناوه‌نده‌ ئه‌كادیمیه‌كانی نه‌یانتوانیوه‌ له‌ئاستێكی باڵادا میدیاكار دروست بكه‌ن.

*سیستمی وه‌رگرتنی فێرخواز له‌ كۆلێژو ناوه‌نده‌كاندا پێویسته‌ گۆڕانكاری ته‌واوی به‌سه‌ردا بێت.

*كاربكرێت بۆ ده‌رچوونی میدیا له‌ژێر چه‌ترو هه‌یمه‌نه‌ی حزب و سێبه‌ری حزب و بازرگانانی میدیادا.

*كاری به‌په‌له‌و بێ دواكه‌وتن بۆ جێبه‌جێ كردنی یاسای خانه‌نشینی رۆژنامه‌نووسان بكرێت.

-بۆیه‌ له‌سه‌رده‌مێكی وه‌ك ئه‌م سه‌رده‌مه‌دا، ناكرێت ته‌نها پیرۆزبایی بۆ بنه‌ماڵه‌ی به‌درخانیه‌كان بنێرین و ستایشی رۆڵی ئه‌وان بكه‌ین، به‌ڵام گله‌ییه‌ك له‌خۆمان و ده‌زگاو كه‌ناڵه‌كانمان نه‌كه‌ین كه‌ پاش سه‌ده‌یه‌ك و بیست ساڵ میدیاكانمان له‌م ئاسته‌دا بن..

هه‌موومان.. له‌دوای تێپه‌ڕبوونی 120 ساڵ پشكێكی ئه‌م كه‌مته‌رخه‌مییه‌و ئه‌م گله‌ییانه‌مان به‌رده‌كه‌وێت، بۆیه‌ خۆمان به‌كه‌مته‌رخه‌م ده‌زانین له‌ئاست ئه‌و كه‌لێن و كه‌موكوڕییانه‌ی كه‌ میدیای كوردی ئه‌مڕۆ به‌ده‌ستییه‌وه‌ ده‌ناڵێنێت..

له‌ناو گێژداوی ئه‌م هه‌موو كێشه‌و قه‌یرانانه‌ی میدیادا ده‌ستمان له‌سه‌ر دڵمانه‌ نه‌ك له‌سه‌روبه‌ندی هه‌ڵمه‌تی هه‌ڵبژاردندا میدیا ببێته‌ هۆكارێك بۆ تێكدانی یه‌كڕیزی نیشتمانی و كه‌تنێك له‌ده‌ستی بقه‌ومێت، كه‌ ئیتر نه‌توانین رووی سووور بۆ میدیا بگه‌ڕێنینه‌وه‌..

بۆیه‌ ئێمه‌ له‌ لقی سلێمانی سه‌ندیكای رۆژنامه‌نووسانی كوردستان زۆر به‌ وردی و له‌نزیكه‌وه‌ چاودێری ره‌وشی میدیا و كاره‌كانی ده‌كه‌ین و هه‌ر له‌م پێناوه‌شدا سه‌رجه‌م چالاكی و مه‌راسیمه‌كانی ئه‌م یاده‌مان دواخست بۆ واده‌ی دوای هه‌ڵبژاردنه‌كان، تا له‌ ژینگه‌یه‌كی هێمن و بارێكی ده‌روونی جێگردا، سه‌رجه‌م چالاكیه‌كانی لقه‌كه‌مان به‌ زنجیره‌یه‌ك كۆڕو رێزلێنان و دیاریه‌وه‌ بۆ كه‌ناڵه‌كان و میدیاكاران سازبكه‌ین..

لێره‌شدا سڵاوی به‌ئه‌مه‌ك و وه‌فامان بۆ قوتابخانه‌ی رۆژنامه‌وانانی سلێمانی و رابه‌ری رۆژنامه‌گه‌ریمان میر مقداد مه‌دحه‌ت به‌درخان ده‌نێرین.

لقی سلێمانی
سه‌ندیكای رۆژنامه‌نووسانی كوردستان

خاك