گروپی كۆمپانیاكانی قەیوان رووبەری 200 دۆنم زەوی لە چیای ئەزمڕو كۆیژە سەوز دەكات و وەك ئەركێكی نیشتمانی ئامادەیی خۆی نیشاندا بۆ بەدەنگەوە هاتنی كەمپینەكەی قائیمقامیەتی سلێمانی و پاراستنی ژینگەی هەرێمی كوردستان و شاری سلێمانی. ئەلەند مەحوی لێپسراوی راگەیاندن و پەیوەندییەكانی گروپی كۆمپانیاكانی قەیوان دوای كۆبوونەوەی لەگەڵ ئاوات محەمەد قائیمقامی سلێمانی لە لێدوانێكی رۆژنامەوانیدا رایگەیاند: وەك ئەركێكی نیشتمانی بۆ پاراستنی ژینگەو تەندروستی هاووڵاتیان بەپێویستیانزانی وەك گروپی كۆمپانیاكانی قەیوان بەدەنگ بانگەوازو پێشنیارەكەی قائیمقامیەتی سلێمانییەوە بێن و بە سەوزكردنی رووبەری 200 دۆنم زەوی بەشداربن لە كەمپینی سەوزكردنی چیای ئەزمڕو گۆیژەی شاری سلێمانی. ئاماژەی بەوەشكرد گروپی كۆمپانیاكانی قەیوان بەشداریكردن لە كەمپینەكە بە ئەركێكی نیشتمانی گەورە دەزانێت و رۆڵی گرنگی خۆی دەبینێت لە سەرخستنی كەمپینەكەو زیادكردنی رێژەی سەوزایی لە شاری سلێمانی. لە بەرامبەر ئەو هەڵوێستەش ئاوات محەمەد قائیمقامی سلێمانی سوپاسی و پێزانینی خۆی گەیاندە گروپی كۆمپانیاكانی قەیوان و رایگەیاند: بەشداریكردنی كۆمپانیای قەیوان و سەرجەم كۆمپانیاكانی تری كەرتی تایبەت لە كەمپینەكەدا ئاماژەیەكی گەورەی هەستكردنە بە بەرپرسیارییەتی و خەمی گشتی و بەشداریكردنی كەرتی تایبەت لە پرۆژەیەكی نیشتمانی بۆ پاراستنی ژینگەو تەندروستی هاووڵاتیان. وتیشی: ئەگەر هاوكاری ماددی و خەمخۆری و پەرۆشی كەرتی تایبەت نەبوایە نەدەتوانرا كەمپینێكی گەورە بۆ سەوزكردنی چیای ئەزمڕو گۆیژە جێبەجێبكرێت. خاك - راگەیاندنی قائیمقامیەتی سلێمانی
created by Avesta Group and powered by Microsoft Azure