جارێ وەرە و ڕوو بنوێنە

غەزەلێکی تری مەولانا جەلالەدینی ڕۆمی بە وەرگێڕانی: ئازاد بەرزنجی

 
غەزەلی"جارێ وەرە و ڕوو بنوێنە"
ئەی هەموو ئارەزووی دڵم جارێ وەرە و ڕوو بنوێنە
ئەی موراد و ئەی حاسڵم جارێ وەرە و ڕوو بنوێنە
من ئاڵۆز و پەرێشانم چون زوڵفی تۆ چون زوڵفی تۆ
تۆ ئەی ئاڵۆزی ڕەوێنم جارێ وەرە و ڕوو بنوێنە
دی باسی ڕێ و مەنزڵ مەکە باسی مەکە باسی مەکە
تۆ ڕێگا و مەنزڵی منی جارێ وەرە و ڕوو بنوێنە
مشتێ گڵت لەسەر زەوی هەڵگرت و ڕفاند، مشتێ گڵ
من وام لەناو ئەو گڵەدا جارێ وەرە و ڕوو بنوێنە
تا لە چاکە و لە خراپە بەئاگا بم بەئاگا بم
لە جەماڵی تۆ غافڵم جارێ وەرە و ڕوو بنوێنە
تاکو نەسووتێ ئەقڵی من لە عیشقی تۆ، لە عیشقی تۆ
غافڵم نەوەک عاقڵم جارێ وەرە و ڕوو بنوێنە
شا سەڵاحەدین کە تۆ هەم حازریت و هەمیش غایب
ئەی ئوعجوبەیی واسڵم جارێ وەرە و ڕوو بنوێنە