22/12/2018 04:12 PM

سوپاسنامەی کونسڵخانەی پۆلەندا بۆ بەڕیوبەری گشتی دیوان خەلیل عەبدولڵا

دوای ئەوەی لەم رۆژانەدا کۆپییەک لە کتێبی (پۆلۆنیا، پۆڵەندا یا لھستان)ی شەھید (مەحمود جەودەت)م بۆ کونسڵخانەی پۆڵەندا لە ھەولێر نارد کە ساڵی ١٩٣٦ نوسراوە، ئەمڕۆ ١٩-١٢-٢٠١٨بەرێز جێگری سەرکونسڵ بەنامەیەکی رەسمی سوپاسگوزاری خۆی راگەیاند کە ئەمە دەقی تەرجەمەکراوێتی:

بەڕێزم
ھیوادارم باش بیت
زۆر سوپاس بۆ ئەو کۆپییە لە کتێبی (مەحمود جەودەت) دەربارەی پۆڵەندا. من ناتوانم کوردی بخوێنمەوە، بۆیە داوا لەیەکێک دەکەم بۆم وەربگێڕێت. بەڵام بەچاوپیاخشاندنێکی خێرا بە ناوەکان و وێنەکان و ئەو ڕووداوانەی لە کتێبەکەدا باسکراون ،دیارە کە کتێبێکی سەرنجڕاکێشە و بەڵگەیەکە بۆ پەیوەندی پۆڵەندی-کوردی.

لەگەڵ ڕێزدا.

ستانیسلۆ گولینسکی
جێگری سەرکونسڵ

مەحمود جەودەت: روناكبیر‌و وڵاتپەروەر

مەحمود جەودەت كەسایەتییەكی گەورەی نیشتمانی‌و رۆشنبیریی كوردستانە‌و لەچەند بوارو رشتەیەكدا خزمەتی زۆری بەگەل‌و نیشتمانەكەی كردووە.
مەحمود جەودەت كوڕی ئەحمەد جەودەت كوڕی مەحمود ئاغا كە بەمەحمود جەودەت ناسراوە، ساڵی 1889 لەشاری سلێمانی لەدایك بووە.
حەسەن ئاغای دەوڵەتی مامی ئەركی بەخێوكردن‌و پەروەردەكردنی گرتە ئەستۆو خستۆتیەتییە بەرخوێندن، سەرەتا لەقوتابخانە ئاینییەكان‌و دواتر لەمەدرەسەی روشدیەی عەسكەریی سلێمانی‌و مەدرەسەی جەنگی لەئەستەنبوڵ خوێندوویەتی‌و بووە بەئەفسەر لەسوپای عوسمانی.
دوای شكستی ئیمپراتۆریەتی عوسمانی لەجەنگی یەكەمی جیهان، گەڕاوەتەوە شاری سلێمانی‌و پەیوەندی بەشێخ مەحموودی نەمرەوە كردووە‌و وەك ئەفسەرێك هاوكاری كردووە.
مەحمود جەودەت هەموو ئاواتی سەركەوتنی گەلەكەی بووە، بۆ ئەو مەبەستەش لەچەند كۆمەڵەیەكدا كاری كردووە. لەوانە كۆمەڵی سەربەخۆیی كوردستان كە لەساڵی 1919 رۆڵی دیاری لەدامەزراندنیدا هەبووە. هەروەها ئەندامی دەستەی بەڕێوەبردنی كۆمەڵەی سەركەوتنی كورد بووە.
مەحمود جەودەت هاوكاری كۆمەڵەی ژێكافی كردووە‌و تەشكیلاتی سەربازی بۆ دامەزراندوون.
مەحمود جەودەت كەسێكی روناكبیرو شاعیرو ھونەر پەروەر بووە، بایەخێكی زۆری بەو بوارە داوە. زمانەكانی فەرەنسی‌و ئینگلیزی‌و توركی‌و فارسی‌و عەرەبی بەباشی زانیوە، بەهۆی ئەوەوە سوودی لەئەدەبیاتی ئەو گەلانە وەرگرتووە.
مەحموود جەودەت بایەخی بە بوارەكانی ئەدەب ھونەر بەگشتی داوە، لەو چوارچێوەیەدا سروودی نیشتمانی بۆ خوێندكارانی قوتابخانەكان داناوە، وتاری بۆ  گۆڤار‌و رۆژنامەكانی ئەو سەردەمە نوسیوە‌و لە (پێشكەوتن، ئومێدی ئیستقلال،ژیانەوە، هاوار، زاری كرمانجی) بڵاوی كردوونەتەوە.
خاوەنی چەند كتێبێكی چاپكراویشە، لەوانە كتێبێك سەبارەت بەتێكۆشانی گەلی پۆلۆنیا بەناوی (پۆلۆنیا) لەساڵی 1936 چاپی كردووە.كتێبێكی تری بەناوی بەهائوڵڵا‌و دەوری نوێ‌ لەساڵی 1933 لەزمانی ئینگلیزییەوە تەرجەمە كردووە‌و چاپی كردووە.
چیرۆكێكیشی لەسەر مامە یارە نوسیوە‌و ساڵی 1933 لەگۆڤاری یادگاری لاوان بڵاوی كردۆتەوە.
چەند پارچە شیعرێكی شاعیری ناوداری فەرەنسی(سوللی) بۆ زمانی كوردی تەرجەمە كردووە‌و ئەحمەد موختار بەگی جاف جارێكی تر ئەو شیعرەی داڕشتۆتەوە‌و  بەناوی (گوڵی خوێنین) بڵاوی كردۆتەوە‌و لەدیوانەكەیدا هەیە.
لەزمانی ئینگلیزیشەوە شیعری بۆ سەر زمانی كوردی تەرجەمە كردووە.لەوانە شیعری گوڵ‌و بەهاری تنسیۆنی شاعیری ئینگلیز.
ئەم كەسایەتییە ناودارەی كورد لە ساڵی 1937 مامەڵەی خانەنشینی ئەبێ‌ لەفەرمانگەی خانەشینی بەغدا، بەهۆی ئەوەی بەرپرسێكی ئەو فەرمانگەیە سوكایەتی بەكورد‌و سەركردەكانی ئەكات، ئەیكوژێ‌.
لەسەر ئەوە مەحموود جەودەت دەستگیر ئەكرێ‌‌و لە 20ی تشرینی دووەمی 1937لەسێدارە ئەدرێ‌‌و تەرمەكەی ئەبرێتەوە بۆ شاری سلێمانی‌و لەگردی سەیوان بەخاك ئەسپێردرێ‌.
ئەوەش ئەبێتە مایەی نیگەرانی‌و خەمباری خەڵكی كوردستان بەگشتی‌و شاعیران بەتایبەتی، شاعیرانی وەك حەمدی‌و پیرەمێرد‌و شێخ سەلام‌و بێكەس‌و گۆران بەشیعر شیوەنی بۆ ئەگێڕن.
درود بۆ گیانی پاك‌و پیرۆزی مەحمود جەودەتی روناكبیرو وڵاتپەروەر.

 





created by Avesta Group and powered by Microsoft Azure

Copyright © 2015 khaktv all rights reserved