11/2/2019 09:17 AM

وه‌زیری خوێندنی باڵا: ئه‌كادیمیستان ده‌توانن رۆڵی گه‌وره‌ بگێڕن

وه‌زیری خوێندنی باڵاو توێژینه‌وه‌ی زانستی رایگه‌یاند: وڵاته‌كه‌مان پێویستی زۆری به‌ ڕۆڵ و تێڕوانینی ئه‌كادیمیستان هه‌یه‌ تا ئه‌و كێشانه‌ چاره‌سه‌ربكه‌ن كه‌ له‌ سێكته‌ره‌ جیاوازه‌كان ڕوبه‌ڕووی كۆمه‌ڵگه‌كه‌مان ده‌بێته‌وه‌.

د.یوسف گۆران وه‌زیری خوێندنی باڵاو توێژینه‌وه‌ی زانستی ڕێكه‌وتی 10/2/2019 له‌میانه‌ی پێشوازیكردنی وه‌فدێكی سه‌ندیكای ئه‌كادیمیستانی عیراقیدا هات.

له‌ دیدارێكدا كه‌ د.نه‌ژده‌ت ئاكرێی به‌ڕێوه‌به‌ری گشتی فه‌رمانگه‌ی توێژینه‌وه‌و په‌ره‌پێدان و د.محه‌مه‌د حسێن سه‌رۆكی ده‌زگای سه‌رپه‌رشتی و دڵنیایی جۆری به‌ڕێوه‌چوو، له‌ سه‌ره‌تادا د.مهند الهلال نه‌قیبی سه‌ندیكای ئه‌كادیمی عێراقی به‌ ناوی وه‌فدی هاوڕێی سوپاسی ئه‌و میوانداریه‌ی كردو كورته‌یه‌كی له‌باره‌ی سه‌ردانه‌كه‌یان و ئامانجی دامه‌زراندنی ڕێكخراوه‌كه‌یان باسكرد.

وتیشی: ئه‌خوازین سه‌ندیكاكه‌مان ڕۆڵی هه‌بێت له‌ ڕێكسختنه‌وه‌ی ئه‌كادیمیسته‌كان له‌ سه‌رانسه‌ری عێراق، هه‌روه‌ك داواشی له‌ وه‌زیری خوێندنی باڵاو توێژینه‌وه‌ی زانستی كرد میكانزمی كاركردنیان له‌ هه‌رێمی كوردستان بۆ دابنێین.

راشیگه‌یاند: سه‌ندیكاكه‌مان سه‌ندیكایه‌كی نوێیه‌و هه‌وڵی ڕێكخستنه‌وه‌ی كاروباره‌كان ئه‌كادیمیستان ده‌ده‌ین و كارده‌كه‌ین تا هه‌ماهه‌نگی له‌نێوان زانكۆكان و ئه‌نجومه‌نی زانكۆكان په‌ره‌پێبده‌ین بۆ چارسه‌ركردنی ئه‌و كێشانه‌ی ڕوبه‌ڕووی مامۆستایان و ئه‌كادیمیستان و زانكۆكان ده‌بێته‌وه‌.

له‌ به‌رامبه‌ردا، د.یوسف گۆران وه‌زیری خوێندنی باڵاو توێژینه‌وه‌ی زانستی دوای به‌خێرهێنانی وه‌فدی میوان به‌گرنگيیه‌وه‌ باسی له‌ پێگه‌و ڕۆڵی ئه‌كادیمیسته‌كان كردو ڕایگه‌یاند: پیویستی زۆرمان به‌ ڕۆڵی ئه‌كادیمیستانه‌ نه‌ك ته‌نها بۆ چاره‌سه‌ركردنی كێشه‌ ئه‌كادیمیه‌كان و زانكۆكان، به‌ڵكو بۆ كێشه‌ سیاسی و كێشه‌كانی دیكه‌ی كۆمه‌ڵگه‌ش، چونكه‌ ئه‌قڵ و بیركردنه‌وه‌و تێڕوانینی كه‌سانی ئه‌كادیمی ته‌نها تێڕوانینی ئه‌كادیمی و بێلایه‌نیه‌، ئه‌وه‌ش ڕۆڵێكی باش ده‌گێڕێت.

سه‌باره‌ت به‌ داواكه‌یان، د.یوسف گۆران ڕایگه‌یاند: وه‌ك وه‌زاره‌ت به‌خۆشحاڵیه‌وه‌ پێشوازی له‌هه‌ر دیدارو گفتوگۆو چاوپێكه‌وتنێكی ئه‌كادیمی و‌ كۆڕو كۆنفرانسی زانستی له‌نێوان ئه‌كادیمیستان له‌ سه‌رانسه‌ری عیراق ده‌كه‌ینه‌وه‌، چونكه‌ پێمانوایه‌ ئه‌و په‌یوه‌ندی و ئاڵوگۆڕی زانسته‌ نه‌ك ته‌نها بۆ ئه‌كادیمیسته‌كان، به‌ڵكو بۆ لایه‌نه‌كانی دیكه‌ی ژیانیش گرنگ و كاریگه‌ره‌.

وتیشی: دوای هه‌ڵسه‌نگاندنی وردی داواكارییه‌كه‌تان، وه‌مڵاتان ده‌ده‌ینه‌وه‌.


خاك - به‌ڕێوه‌به‌رایه‌تی راگه‌یاندنی وه‌زاره‌تی خوێندنی باڵا





created by Avesta Group and powered by Microsoft Azure

Copyright © 2015 khaktv all rights reserved